Atzo, azaroaren 28an, Bizkaiko gasolina-zerbitzuguneen hitzarmen kolektiboaren aurreakordioa sinatu zuen LABek, eta ondorioz, abenduaren 1etik 5era deituta zeuden grebak bertan behera geratzen dira.
Aurreakordioa termino hauetan sinatu dugu:
- Indarraldia: 2020-2022 eta ultraktibitate mugagabea.
- Igoerak: 2020rako, 2019ko KPI (%1,2); 2021erako, igoerarik gabe, 2020ko KPI negatiboa izan zelako
(-%0,3); eta 2022rako, %6,1, 2021eko KPI eta 2020koaren arteko aldea. - Ordaindutako lizentzia berri bat sortzea, mendekotasuna duten adingabeei eta/edo adinekoei mediku-
laguntza emateko. - Ekoizpenaren gora-beherengatik kontratatutako langileek kontratatuak izaten jarraitu ahal izango dute
18 hilabetetan 12 hilabetez jarraian, 12 hilabetetan 6 hilabetez izan beharrean.
Hiru urteko negoziazio gogorra eta luzea izan da. Hiru urte hauetan, pandemia dela eta, asko sufritu du funtsezko sektore honek. Langileak izan dira ondorioak ordaindu behar izan dituztenak, enpresa handiek irabaziak handitzen zituztelako beren bizitza pobretzen ari zen bitartean.
Inguruabar horiek guztiak direla eta, azken proposamen hori aztertu dugu, erantzukizunetik abiatuta eta aurretik aipatutakoa kontuan hartuta. Gure ustez, ziklo hau ixteko eta 2023an negoziazio berri bati ekiteko aukera ematen diguten gutxieneko batzuk betetzen ditu, eta horrek indartsu hastea ekarriko digu, hala nola erosteko ahalmenari eustea eta hobekuntza sozialak, hasieratik negoziazio-mahaian adierazi ditugunak.
Hiru urte hauetan, negoziazioaren zama etengabe LABen pausatzen zen bitartean, mahaian ordezkaritzaren % 9 soilik izan arren, argi geratu da zein garen benetako kontraboterea, langileen eskubideen defentsa soilik helburu duen ekintza sindikalaren ereduarekin. Maiatzean hitzarmena arriskuan zegoenean, gogor eta patronalaren xantaiari amore eman gabe eutsi genion. Ez dezagun ahaztu CCOO eta UGT prest zeudela eraginkortasun mugatuko hitzarmen bat sinatzeko, horrek dakarren guztiarekin (sektoreko langile guztiei ez aplikatzea eta legalki beharrik ez egotea). ELAk, bestalde, negoziazio-estrategia arduragabea eta korporatiboki interesatua erakutsi du; izan ere, euren ez aplikatzeko klausula defendatzen eta, maiatzean, LABek 2022a negoziazioan sartzeko egindako proposamena bere egiten baino ez da aritu. Hala eta guztiz ere, ez sinatzea erabaki du, euren intereseko klausula sartu ez delako. Erein ez dutena biltzen duen kontrabotere koldarra. Aldiz, LABek pultsuari eustea erabaki zuen, eta horri eta greben mehatxuari esker, puntu honetara iritsi gara. Negoziazio gogorra datorkigu berriz ere datorren urtean baina argi dago elkarrekin eta indarrez aurrera ekingo diogula.
Zorionak Bizkaiko gasolineretako langileei borrokarako izan duzuen prestutasunagatik, hau izan delako patronala behartu duena azkenengo mugimendu hau egitera.
Gora langileon borroka!