2025-04-23
HomeZerbitzu PublikoakEusko JaurlaritzaLABek bere partehartzea eten du EUDELeko Mahai Negoziatzailean

LABek bere partehartzea eten du EUDELeko Mahai Negoziatzailean

Gaur, otsailak 23, udal eta foru administrazioan nagusi diren lau sindikatu eta EUDELeko ordezkarien arteko hirugarren bilera burutu da Udalhitzen negoziazioa dela eta. Gogoratu dezagun Udalhitzek entitate lokaletako 22.000 langile baino gehiagoren lan baldintzak arautzeko erreferentzia nagusia dela Araba, Bizkaia eta Gipuzkoan.

EUDELeko ordezkariek jada lehenengo bileratik eduki errealak izango dituen negoziazio prozesu bati heltzeko borondate eskasa agertu zuten, negoziazioaren abiapuntuan 2010ean Madriletik PSOEren Gobernuak inposatutako murrizketak jarriz. Bigarren bilkuran LABek eta ELAk osatzen dugun gehiengo sindikalak (sektore honetako langileen ordezkaritzaren %85a, hain zuzen ere) aldez aurretik argitu beharreko bi gai nagusi planteatu genizkion alde instituzionalari bermeak izango dituen negoziazio bati heldu ahal izateko.

– Bertan negoziatuko dena ondorenean entitate lokal ezberdinetan betetzeko bermeak izatea.
– 2010ean zerbitzu sozialen eskaintzan eta langileen lan baldintzetan, ALDEBAKARREZ, emandako atzera pausuei buelta ematea.

Gaur erantzun ofiziala jaso dugu, negoziazioari heltzeko planteatzen dituzten mugapen nagusietan berretsiz. Gauzak horrela, LABek eta ELAk ez ditugu oinarrizko baldintzarik ikusten EUDELeko ordezkaritzarekin momentuz negoziatzen jarraitzeko, eta alde horretatik, gure parte hartzea mahai negoziatzaile horretan eteten dugu. Alde horretatik argi utzi nahi dugu:

– Gehiengo sindikalarentzat lan baldintza duinak eta zerbitzu publikoen garapena bermatuko duen sektoreko lan hitzarmena oinarrizko erreferentzia izaten jarraitzen du.
– Alde horretatik, bi sindikatuok horren aldeko mobilizazio dinamikarekin jarraituko dugu.
– Ustezko mugapen juridiko, legal edota ekonomikoen gainetik, alde instituzionalak, eta beraz, PNVk eta PSE-EEk duten borondate politiko eskasean dago funtsezko arazoa; finean, biek ala biek eredu berdina planteatzen dutelako udal eta foru administrazioari begira: prekarietatea, pribatizazioak eta zerbitzu publikoen eta langile publikoen lan baldintzen ahultzea.

Ostiral honetan, hilak 25, goizeko 11:00etan Donostiako udaletxearen aurrean egingo dugun kontzentrazioan hartu dugun erabakiaren gaineko azalpen gehiago emango ditugu.

Euskal Herrian, 2011ko otsailaren 23an

AZKEN ALBISTEAK | ÚLTIMAS NOTICIAS

Enviserreko langileek greba gogortu dute, protestaren hirugarren astean

Hiriko parkeak, lorategiak eta eraztun berdea mantentzeko Gasteizko Udalaren kontrata den Enviser enpresako langileek hiru aste bete dituzte greban. Baldintza duinak jasoko dituen hitzarmen propio bat lortzea da beren helburua. Hainbat langilek Gasteizko udaletxearen aurrean pasa dute gaua, azken honen inplikazioa eskatzeko.

LABek ontzat jo du Iruñeko Udalaren eta alokairuzko bizikleten enpresaren artean sinaturiko akordioari esker langileei zor zitzaizkien soldatak ordaintzea

LAB sindikatuak duela bi aste salatu zuen Ride On Pamplona Iruñeko alokairuko bizikleta elektrikoen zerbitzuko langileak egoera larrian zeudela, sei hilabete baitzeramatzaten nominak berandu kobratzen eta, gainera, enpresak bi nomina oso zor baitzizkien. Iruñeko Udalak eta Ride On-ek gaur iragarri duten akordioaren arabera badirudi zerbitzuaren jarraipena bermatuko dutela eta enpresak berehala kitatuko dituela langileekin dituen zorrak.