Zerbitzu publikoak diru irabazi asmoa duten ekimen pribatuen esku ezin direla utzi sinetsita, LAB sindikatuak urteak daramatza, adibidez, Nafarroa Garaiko anbulantzien publifikazioa eskatzen. Hala, 2019an, LABek ontzat jo zuen anbulantzien zerbitzua kudeatzeko enpresa publiko bat sortzeko proposamena baldin eta horren bidez lanpostu guztiei eusten bazitzaien eta baldin eta gero osasun garraio osoa publiko egiten zen. Proposamen hura orain gauzatuko da, Bidean enpresa publikoaren bidez, eta LABek ontzat jo du gobernuak eginiko urrats hori.
Publikoak izan beharko liratekeen zerbitzuak ezin dira ekimen pribatuaren esku utzi. Ezin da horiekin negozioa egin. Izan ere, horrek iruzurra dakar. Alde batetik, baldintza prekarioen forman azpikontratutako zerbitzu horietan lanean ari diren langileentzat —Baztan Bidasoa eta SSG enpresen kasuan hitzarmena ez betetzen eta langileak diskriminatzen—, baina, beste alde batetik, gizarte osoarentzat, zerbitzuen kalitateak okertze forman.
Erran bezala, LAB sindikatuak urteak daramatza ideia horren alde borrokatzen, publikoaren alde. Eta pertsuasio ariketa hori funtsezkoa izan da eta da Gobernuak halako pausoak eman ditzan. Ildo horretan, oso albiste ona da Gobernuari entzutea osasun garraioaren kudeaketa publikoarekin kalitatea eta eraginkortasuna hobetuko direla, bai eta langileen baldintzak eta pazienteen arreta ere. Hori dela eta, sindikatuak Exekutiboari deia egin nahi dio bide horretan pausoak ematen jarraitzeko.