ETA erakundeak gaur ezagutzera eman duen agiriaren bidez urrats berri bat egiteko prestasuna argi utzi du. Euskal jendarteak aspalditik aldarrikatzen du gatazkaren konponbidea ekarriko duen bidea behingoz egiteko eta, zentzu honetan, Estatu espainiar eta frantziarrarekin elkarrizketa zuzenak abiatzeko ordezkaritza izendatu izana pauso garrantzitsutzat jotzen dugu.
Gatazkaren konponbidea nahi duen edonork aitortuko dio urrats honi garrantzia, aurretik egindako guztiei bezalaxe. Nazioarteko komunitateak ere ETAk hartutako konpromisoak garrantzitsutzat jo ditu. Horren adierazle, duela bi aste Egiaztatze Batzordeak egin zituen adierazpenak edota Aieteko Konferentziak konponbide politiko eta demokratiko baterako markatu zuen ibilbide orriarekin hamarnaka europarlamentarik bat egin izana.
Hala ere, errezeta zaharretan tematurik jarraitzen du PPren Gobernuak, inolako pausorik egin gabe. Adibiderik ez dugu falta: euskal preso politikoen kontrako salbuespen neurriak eta mendeku politiken iraupena, epaiketa politikoak, hala nola, Bateragune auzia edota egun hauetan Auzitegi Nazionalean burutzen ari den Askatasuna eta D3M epaiketa… Edonola ere, PPren itxikeriak denbora muga badauka, hori PPk berak ere badaki. Egoera luzatzea, blokeo egoeran irautea ez da onuragarria inorentzat.
Euskal jendartearen aldarrikapen zabala da, nazioartetik ere aldarrikapen zabala da, ordua da Estatu biek —baita Gasteizko eta Iruñeako Gobernuek ere, euskal jendarteak jarritakoak baitira egiteke dituzten etxeko lanak, pilatzen ari zaizkienak— aldarrikapen hauek entzun eta behingoz urratsak egin ditzaten.
Dena den, espainiar zein frantziar Gobernuek pausoak eman ditzaten aldarrikatzea —esan nahi baita, aldarrikapen hutsean geratzea— ez da nahikoa. Euskal Herriko eragileen esku ere badago egoera mugiaraztea eta konponbiderako bidea azkartzea. Ez da epelkeriaz aritzeko sasoia, hau ez da komunikabideen aurreko adierazpenekin egin daitekeen bidea. Beharrezkoa da, eta bada ordua, oraindik inplikatu ez diren eragileak ere bide honetan inplikatzeko. Gatazkaren konponbidearen alde erantzukizunez jokatzeko garaia da. Asko dago jokoan.
Aldebakarreko urratsekin zabaldu den prozesu hau egonkortu nahi badugu, eragile politiko eta sozialok prozesuaren aldeko konpromisoak hartu behar ditugu, alde anitzeko konpromiso irmoak. Jauzi hori egiteko tenorea da.