Patronalak hitzarmena negoziatzeari uko egin ondoren, LAB, ELA; UGT eta CCOO sindikatuek, Nafarroako Arte Grafikoen Industriako langileen ordezkaritzaren % 100 baitute, argi utzi nahi dute konpromiso irmoa dutela 2014n desagertu zen nafar hitzarmena berreskuratzeko.
2014an, Nafarroako Arte Grafikoen patronala PP-UPNk ezarritako lan-erreformaz baliatu zen sektoreko hitzarmen probintziala bertan behera uzteko. Hitzarmen hori 1977tik zetorren, eta ezinbesteko tresna izan zen sektorean gutxieneko baldintza duinak ezartzeko. Enpresen aldetik 1990eko eta 2000ko urteetan baldintza horiek desagerrarazten saiatu ziren, baina sektorearen mobilizazioek intentzio hori geldiaraztea lortu zuten.
Hitzarmen autonomikoa erori zenean, enpresa gehienek negoziazio-esparru berria erabili zuten sektoreko langileek hitzarmen autonomikoan aitortuta zituzten eskubideak ezabatzeko eta Estatuko baldintzak inposatzeko. Horrek berretsi besterik ez zuen egin Nafarroako sektoreko hitzarmenak ezinbestekoak eta beharrezkoak direla lan-baldintzak duintzeko tresna gisa.
Horregatik, LABek, ELAk, UGTk eta CCOOk atzera bueltarik ez duen bide bati ekin diote, Arte Grafikoen Industriaren Nafarroako hitzarmena berreskuratzeko helburu argiarekin, langile klasearentzako bermea baita. Eta AEGRAN patronalak negoziazio-mahaia osatzearen aurrean eman duen ezezko borobilaren aurrean, aipatu sindikatuek argi utzi nahi dute ez direla geldirik geratuko. Gaurtik aurrera, lantokiz lantoki sinadurak biltzeko kanpaina hasiko dute, patronalaren aurrean sektoreko langileek aldarrikapen hori babesten dutela egiaztatzeko.
Dinamika horren ondoren, patronalak ezezkoarekin jarraituz gero, mobilizatzen eta tonua igotzen jarraituko dute sindikatuek Nafarroako Arte Grafikoen hitzarmena berreskuratu arte.