2013. urteko ordezkaritza sindikalaren emaitza ofizialen arabera, LAB sindikatuak 0,43 puntuko igoera izan du azken urte honetan, bere ordezkaritza maila %17,94 izatera iritsi delarik. Momentu honetan EAE mailan inoiz izan duen ordezkaritzarik handiena dauka LAB sindikatuak eta bigarren sindikatua den CCOOkiko aldeak geroz eta gehiago murrizten ditu.
Nabaria da krisialdi ekonomikoa sekulako eragina izaten ari dela hautatzen diren ordezkari sindikal kopuruan. Enpresa itxierak, mota guztietako presioa,… hauteskunde sindikalak asko baldintzatzen dituzten gaiak dira. Bestalde, nabarmena da LAB sindikatuak ez duela ordezkarien murrizketa hori nozitzen, ez 2013 ezta 2012ko datuetan ere.
Krisialdiak eta lan arautegiaren aldaketa ezberdinek sindikalgintza bidegurutze baten aurrean kokatzen duten honetan, LAB sindikatuak bide egokia hartu duela argi dago, langileen babesa agerian uzten duenez. LABek, lantokiz lantoki, lan baldintzen babesaren oinarri izan behar duen Lan Harremanen Euskal Esparrua lantzen eta defendatzen jarraituko du, hori baita euskal langilegoa sindikalgintzari eskatzen ari zaiona.
Garbi dago bere estrategien menpe bizi diren sindikatuak edo Madrilera begira bizi diren horiek indarra galtzen ari direla eta sakoneko aldaketak gertatzen ari direnean aldaketa politiko eta sozialerako hautua poliki poliki indartzen ari dela.
Herrialdez herrialde begiratuta, guztietan izan ditu igoerak LAB sindikatuak, baina nabarmentzekoa Gipuzkoan izandako igoera izan da, non 0,87 puntuko igoera izan duen. Sektoreka begiratuz gero, nabarmena merkataritzan emandako igoera zein metalgintzan, bai enpresa handian zein txikian.