Ikastetxeetan antzeman zen amiantoaren kasua ezagutu ondoren, oraingoan ezagutu dugu hatzetako pinturak osasunarentzat kaltegarria izan daitezkeela.
Alerta Kontsumoko Euskal Institutuaren (Kontsumobide) eskutik etorri zaigu, zeinak ohartarazten baituen Jovi eta Alpino markek, besteak beste, kalteak eragin diezazkioketela osasunari, pozoitzeak eta infekzioak sor ditzaketela. Azpimarratu, marka horiek erabili ohi direla ikastetxetan.
Sindikatuei ez zaigu inoiz honen berri eman. Zirkular baten bidez egin zezaketen, ikastetxeekin egin den bezala. Gure ustez, sindikatuko ordezkariak garenez, ikastetxeetan osasun arriskuekin zerikusia duten egoerak ezagutu beharko genituzke.
Prebentzio politika egokia izan dadin maila guztietan ezarri behar da, ez da ulertu behar oinarrizko langileengan uzten den zeregintzat. Are gehiago, aipatu oinarrizko langile horiek, lan arriskuei dagokienez, daukaten prestakuntza eskasean erreparatzen badugu.
Ez dugu ulertzen Cristina Uriarteren saila erabiltzen ari den isiltasun dinamika. Informatuak gaudela bakarrik aurkez ditzakegu prebentzioari loturiko proposamenak. Informazioak errazten du osasunaren zaintza. Prestakuntzak egokia izan behar du eguneroko zereginean jasan ditzakegun arriskuak eragozteko eta ezabatzeko.
Dakiguna hedabideen bidez jakin dugu. Ez deritzagu biderik hoberena esparruak partekatzen ditugun eragileen arteko harremanari eusteko.
Sail horrek berriro agertu du ezer gutxi kezkatzen dela, edo ez dela kezkatzen, harremanetarako bidea zabalik edukitzeko, nahiz eskola komunitatea osatzen dugun eragile guztienganako eta gutako bakoitzarenganako nolabaiteko sentikortasuna agertzeko.
Amiantoarekin gertatu bezala, LABek ez du utziko hau guztia isilarazten saia daitezen. Inguratzen gaituzten eta gure osasunari kalte egin diezaioketen produktu eta gai guztien egiazko erregistroa egin dadin egingo dugu lan.