Ordezkoen zerrenden kudeaketa kaxkarra salatu nahi dugu. Azken asteetan egoerak hondoa jo du. Zerrenda asko agorturik daude eta hainbat espezialitatetan ez dira bajak ordezkatzen ari. Arauturiko Lehen Hezkuntzako 4 egunek eta Bigarren Hezkuntzako 5ek irakasleen lan kargan eragin handia dute, baina kasu batzuetan 14 egunetara bidaltzen ari dira ordezko irakaslea. Beste kasu batzuetan, besterik ez dagoenez, ikastetxeei hizkuntz eskakizun gabeko irakasleak eskaintzen dizkiete.
Argi dago gaur egun erabiltzen den kudeaketa ez dela baliagarria. Zerrendak agortzear daudenean irekitzen dira eta bi hilabete behar dira zerrenda berria martxan egon arte. Irizpide horrek arazoak sortzen ditu urtero. Langileen lan karga handitzen da ordezkorik ezean lankideen artean bete behar dituztelako ordu horiek. Ikasleek ere pairatzen dute kaltea ikasgai horietako saio asko galtzen ari baitira.
Hezkuntza Sailburu Cristina Uriarteri galdetzen diogu ea hau den Heziberrin goraipatzen den “kalitatea eta bikaintasuna” helburu duen hezkuntza sistemaren eredua. Izan ere, publikoki hitzen bidez kalitatea aldarrikatzen duten bitartean, ekintzetan eta aurrekontuetan bestelako bidea erakusten dute. LABetik, zerbitzu publikoen defentsan eta langileen eskubideen defentsan, ikastetxeetan dauden beharrizanei aurre egiteko zerrenda guztiak urtero irekitzea eta ordezkapen guztiak lehen egunetik ordezkatzea eskatzen dugu.