LAB sindikatuak idatzi bat erregistratu du Eusko Jaurlaritzan. Hain zuzen ere, alarma egoeraren ondorioz hartutako neurriek jasotako salbuespenen artean, eskubide zibil eta politikoekin lotura duten bilera publiko eta manifestazioei ez zaie erreferentziarik egiten. Hala, eskatu dugu salbuespenen artean langileen mugikortasuna bermatzea ekintza sindikala gauzatzeko ere. Izan ere, oso egoera zaila bizitzen ari gara lan eta arlo sozialean; EEEak, ABEEEak, oinarrizko zerbitzu ez nahikoak, kaleratzeak, lan baldintzen prekarizazioa, kontratazio falta… Hortaz, langileek euren eskubideak ekintza sindikalarekin defendatzeko beste biderik ez dute, eta jarduera hauek guztiak gauzatu ahal izateko kaltetutako langileen mugikortasuna bermatzea ezinbestekoa da.
Honela gauzak, kasu hauetarako mugikortasuna salbuetsita ez badago, patronala-administrazioaren eta langileen arteko oreka hautsiko litzateke, legezko eta bidezko lan baldintzak bermatzeko bidean. Dekretuak lantokira joateko aukera eskaintzen du; bada, aukera bera izan beharko lukete euren lan eskubide eta sozialen defentsan ari diren langileek; mugikortasunean inolako mugarik izan gabe, lan zentroetan aplikatzen diren prebentzio eta segurtasun neurri berak kontutan hartuta (1,5 metroko distantzia, garbitasun eta babes baliabideak…).
Erabaki politiko ausarten beharra
Herritarren oinarrizko eskubideen urraketen aurrean, LAB sindikatuak nabarmendu nahi du egoeraren larritasunak etxeratze agindua edota konfinamendu perimetraletatik haragoko erabaki politiko ausartak eskatzen dituela:
-Zerbitzu publikoen pribatizazio eta merkantilizazio politikarekin amaitu behar da. Inbertsio gehiago bideratu behar dira hezkuntzara, osasungintzara eta gizarte zerbitzuetara, ratioak murriztu eta langile gehiago kontratatu behar dira. Oso nabarmen geratzen ari da hori osasungintzan; pandemia bati aurre egiteko osasun sistema publiko indartsua ezinbestekoa izanik, ez da erabakirik hartu norabide horretan.
-Zaintza sistema publiko baten beharra dago. Helduen zaintzak eredu aldaketa sakona eskatzen du; onartezina da negozioa egitea pertsonen zaintzarekin. Kalitateko zerbitzu bat eman ahal izateko langileen lan baldintzak hobetu egin behar dira, publifikazio prozesuak bultzatuz edota ratioen lege berri bat eginez. Haurren zaintzari dagokionez, ez ohiko kurtsoa izanik, haurrak etxean konfinatuak dauden kasuetarako zaintzarako baimenak ematea eskatzen dugu.
-Enplegu asko suntsitu da, eta gazte eta emakumeak dira kaltetuenak. Milaka lanpostu daude kolokan, ERTEak amaitzean langile askok ez dutelako enplegua bermatua. Enplegu politika berri bat behar da.
-Pobreziak eta behar sozialek gora egin dute, eta babes sozial sistema hobetzeko neurri bakar bat ere ez dugu ezagutzen.
Langileok antolatu eta mobilizatzen jarraituko dugu, zerbitzu publikoen defentsan, enpleguaren defentsan eta pentsio duinak eta oinarrizko behar sozialak herritar guztiei bermatzeko.