LAB, ELA, CCOO, USO, ESK eta CGT sindikatuok elkarretaratzea egin dugu Gasteizen, Lakuan, Eusko Jaurlaritzaren egoitza aurrean, bere erantzukizuna bere gain har dezan eskatzeko, bai bere kontratazio-eremuan, bai Arabako metalgintzaren prekaritate-egoeraren aurrean.
Sindikatuok hiru greba egun deitu ditugu Arabako metalgintzan irailaren 21, 22 eta 23rako, sektorea duintzeko eta hitzarmena desblokeatzeko. SEAk urrats ausartak eman behar ditu akordio batera iritsi ahal izateko. Prekaritate-egoera jasanezina da, eta inflazioaren gorakada egoera hori sakontzen ari da.
Horren aurrean, sindikatuon arabera, Eusko Jaurlaritzak eta Administrazio Publikoek posizionatu behar dute, Arabako metalgintzak diruen lan baldintzak kontutan hartuta: hileko 1400 eurotik beherako soldatak, inguruko metal-lanaldi altuena, subrogazio-eskubiderik gabe, malgutasun handiarekin. Hori guztia 25.000 pertsonari eragiten dien hitzarmen batean.
KPIren araberako igoerak jaso behar dira tauletan zein soldata errealetan, lanaldia nabarmen jaitsi behar da, baja medikoen osagarriak hobetu behar dira, subrogazioa jaso behar da, malgutasuna mugatu behar da eta bizitza erdigunean jarriko duten neurriak hartu behar dira, laneko osasunean eta berdintasunean hobekuntzak egitearekin batera.
Administrazio publikoek hitzarmen hau hobetu dezakete eta hobetu behar dute. Gaur egun, Administrazioek kontratatzen edo azpikontratatzen dituzten lan asko Arabako metalgintzaren baldintzen babespean daude, eta horrek esan nahi du Administrazioak berak, enpresaburu eta patronala den aldetik, baldintza prekarioez baliatzen dela.