LABek mobilizazioa egin du Bilbon, Lan Ikuskaritzaren aurrean, eta salaketa bat aurkeztu du bertan Igorreko Velatia taldeko lantegiko aldi-baterakotasun handiaren aurrean. Sindikatuaren arabera, egoera hau ez da legezkoa eta prekaritate handia dakar langileentzat.

Velatia taldeko Igorreko lantegian, guztira dauden 500 langiletatik 150 langile baino gehiago dira behin- behinekoak. Lantegi hori hiru enpresatan banatuta dago (Tecnichapa, Ormazabal eta OPA), eta behin-behineko langileen kopurua enpresa bakoitzeko langileek egin dituzten borroken araberakoa da. Adibidez, Tecnichapan, enpresak behin-behineko langileen % 60ren finkatze-prozesua hasi du, plantillako borroken ondorioz. Taldeko beste enpresa batzuetan, ordea, enpresaren zikoizkeriagatik eta beste sindikatuen utzikeriagatik, enpresak egin nahi dituen kontratu finkoen kopurua hutsaren hurrengoa da. Ormazabalen, adibidez, behin-behineko 9 langile finko bihurtzeko proposamena egin du, eta 90 dira behin-behineko langileak guztira.

Lotsagarria iruditzen zaigu 500 milioi euro baino gehiago irabazten dituen enpresa batek % 30 inguruko behin- behinekotasuna izatea. Gainera, azken urteotan, ekoizpena eta etekinak handitu ahala, behin-behineko langileen ehunekoa handitu egin da, argi eta garbi egiturazkoak diren lanpostuak prekarizatuz eta aspalditik erabiltzen dugun leloa egia bihurtuz: “zuen irabaziak gure miseriaren kontura dira”.