Sistema kapitalista zisheteropatriarkalaren interesak defendatzen dituzten patronalen aurrean bizitza duina defendatuko dutela ohartarazi dute sindikatuek eta mugimendu feministak Bilbon egindako mobilizazioan.
Emakumeen* Mundu Martxaren VI. Nazioarteko Ekintza lurreratu da Euskal Herrian, Herrien burujabetza eta bizita duina. Gerra eta kapitalismoaren kontra! lelopean. Ekintza sindikala egin dute Bilbon LAB, STEILAS, ELA eta ESK sindikatuek, mugimendu feministarekin elkarlanean, eta Confebask aurrera eraman dituzte herrien burujabetzaren eta bizitza duinaren aldeko, eta gerraren eta kapitalismoaren aurkako aldarrikapenak.
Euskal Herriko Emakumeen* Martxak hiru gaitan jarri du aurten fokua: lurraren defentsan, migrazio politiketan eta indarkeria matxistan, eta horietan eragile soziosindikalek eta mugimendu feministak elkarlanean aritzeko konpromisoa adierazi dute:
Klima larrialdiaren aurrean, lurraren defentsa eta mundu eta bizitza bizigarriak
Baliabide naturalen ustiaketa, biodibertsitatearen galera masiboa, lurren esplotazioa eta abar oso abiadura azkarrean gazuatzen ari direla salatu dute, eta hori planetaren ustiatzea eta xahutzea oinarri duen gizarte ereduaren ondorio dela, hori bultzatzen, sostengatzen eta ahalbidetzen duten erakunde finantzario eta ekonomikoekin batera. Hain justu, erakunde ekonomiko zein finantzario horiek interpelatu dituzte Iberdrola dorrearen paretik. Halaber, ustiapen eta xahutze hori ipar globalak hego globalarekiko egiten duela gogoratu dute, eta hegoaldeko herrialdeak kolonizatzen jarraitzeko mekanismoa dela. “Ezin dugu beste aldera begiratu. Bizi garen lurralde honetatik ere badugu erantzukizuna”, adierazi dute.
Era berean, sistema zisheteropatriarkal kapitalista eta kolonialista honi zuzenean begiratzeko beharra ere aipatu dute: “Jendarte egitura hau lur eta gorputz jakin batzuen gaineko esplotazioan oinarritzen da. Bazterreko subjektuak kolpatzen dituen sistema batean bizi gara, sistemak berak sortzen dituen ete etengabe erreproduzitzen dituen subjektuak. Gorputz migratu eta arrazializatuak dira zapalkuntza horien jopuntuan daudenak, besteak beste”.
Migrazio politikak, munduko sistemaren egitura kolonialaren ondorio
Sistema hau sostengatu eta ahalbidetzen duten estatuen arteko mugekin apurtu beharra aldarrikatu dute, horiek gorputz batzuenganako dominazioa eta indarkeria gauzatzeko tresna gisa ulertzen baitituzte. Hori horrela, atzerritartasun legea bezalako politikak abolitzea urgentziazko neurrien artean kokatu dute, eta indarkerkeria eta arrazismo instituzionala salatu dituzte, baita egitura horiek guztiak sostengatzeko bideratzen dituzten inbertsioak ere.
Indarkeria matxistak, egiturazkoak
Indarkeria matxistak egiturazkoak direla berretsi, eta erakunde patriarkalek eta estatuek emakume eta gorputz disidenteen bizitzak, gorputzak eta sexualitatea kontrolatzeko tresna gisa erabiltzen dituztela salatu dute.
Horren guztiaren aurrean antolatuta eta kaleak hartzeko prest daudela ohartarazi dute, eta “sistema kapitalista zisheteropatriarkalaren interesak defendatzen dituzten” patronalen aurrean, Confebask kasurako, bizitza duina defendatuko dutela: “Gure gorputz eta lurraldeak erasotzen dituztenei aurre egiteko eta indarkeriarik gabeko gorputz eta lurraldeen alde antolatuko gara; feminismotik eragiten jarraituko dugu”.
Gaurko mobilizazioa baliatu dute sindikatuek eta mugimendu feministako kideek, era berean, bihar Tuteran hasi eta Donostian amaituko diren ekimen eta mobilizazioetan parte hartzera dei egiteko, baita ekainaren 13an, 14an eta 15ean Marsellan egingo den Nazioarteko VI. Ekintzara joateko deialdia egiteko ere.
