Gipuzkoako eraikuntzako hitzarmena berritzeko negoziazio mahaiaren bilera berri baten bezperan, Adegik bilera atzeratzea eskatu du “denbora izateko, proposamen bat osatzeari begira”. Horren ondorioz, hurrengo bilera maiatzaren 16an izango da, bihar beharrean.
LABek gogor salatzen ditu Adegiren blokeoa eta jarrera arduragabea. Ez dago aitzakiarik bihar bilera ez egiteko, Adegi bera izan baitzen biharko data, alegia maiatzaren 4koa, aukeratu zuena proposamena landu ahal izateko. Ia bi hilabete daramatzagu bilerak hasi zirenetik hitzarmen kolektiboa berritzeko. Badira aste batzuk Adegik ezagutzen dituela sindikatuen aldarrikapenak.
Egoeraren larritasunaren aurrean, LABek honakoa exijitzen dio Adegiri:
-Maiatzaren 16a baino lehen aurkez diezaiela bere proposamena sindikatuei, 16ko bileran negoziazioetan hasteko.
– Sindikatuok aurkeztutako proposamenei erantzungo dien proposamena bat idatziz ekartzea.
Hau horrela ez bada, LABek gainerako sindikatuei berehala mobilizatzen hasteko planteatuko die. Greba gero eta gertuago dago Gipuzkoako eraikuntzan.