LAB sindikatutik neurri horien azala zein mamia kritikatzen dugu. Gure ustez, planteaturiko neurriok ez dira nahikoak, asko ez ditugu begi onez ikusten, gertatu diren filtrazioen onarpen faltatik abiatu dira eta modu antidemokratiko eta baztertzailean onartu dira, filtrazioak salatu dituzten indar sindikalak kanpoan utzita, hain zuzen ere.
Honekin jarraituz, ez da onargarria neurriok soilik SME, SATSE eta UGT sindikatuekin sinatu izana, hau da, EPE ustelaren sinatzaileekin.
Osakidetzako EPEaren filtrazioak oso gai larria da, milaka pertsonari eta euskal jendarte osoari eragiten diona. Beraz, ez da ulergarria langileon ordezkaritzaren parte handi bat baztertzea halako gaietan.
Zentzu honetan, LAB, ELA eta CCOO sindikatuok gaurko Mahai Sektorial fartsatik altxatu gara, egoera salatzeko. Are deigarriagoa da LAB bezalako sindikatua gertatu denaren balizko “konponbidetik” at uztea, lehenengo momentutik filtrazioak salatu ditugunean, fiskaltzara jo dugunean eta abian den prozesu penala Herri Akusazioa garenean.
Bestaldetik, etorkizuneko filtrazioak ekiditeko proposamenak egitea, oraindik orain gertatu eta gertatzen diren filtrazioak onartu ez dituztenean, borobila karratu bihurtzea da. Osakidetzak etorkizunean EPE garbiak nahi baditu, lehenengo eta behin gertatu dena onartu behar du eta baita bere erantzukizun guztiak ere. Bestela, euskal jendarte zein oposizioetan parte hartzen duten guztiei iruzur egitea baino ez da izango.
Azkenik, aurkeztu dituzten neurrien edukia ez dela nahikoa eta neurri askoren kontra gaudela adierazi nahi dugu, batez ere 4. Eta 5. Ataletan jasotakoak, Epaimahaiak eta Azterketak jasotzen dituztenak (adibidez, ez dugu onartzen elkarrizketen sistema, guztiz subjektiboa dena).
LABek, bere momentuan, Osakidetzak kontuan hartu ez dituen oinarrizko neurri batzuk jarri zituen mahai gainean: azterketak pertsona bakar batek presatzea, IVAPen enkarguz; edo EPE proben kudeaketarako gidaliburu operatiboa osotasunean betetzea. Bestaldetik, ez dugu uste azterketak prestatzeko EAEtik kanpoko profesionalen beharrik daukagunik. Gure herrian eta bertoko profesionalekin, borondate politiko eta neurri zorrotzak badaude, gai gara EPE prozesu garbiak aurrera ateratzeko.