LAB, ELA, UGT eta CCOO sindikatuok agerraldi bat egin dugu gaur, Lanbideko bulegoetan ezarri nahi duten Arreta Eredu Berriari buruzko balorazioa egiteko. Hain zuzen ere, eredu hau Lanbideko hiru bulegotan martxan jarri dute, lurralde bakoitzeko bana, “ereduzko plan” gisa, bai era partzialean (DBE-aren kudeaketari dagokion zatia soilik, bestelako zerbitzuak kanpoko enpresen esku utziz), edota bulegoetako dimentsioak zein beharrak kontuan hartu gabe, baita emaitzen balorazioa egiterako orduan ere (emaitzen informeak sarritan eskatu arren, eskuratu ezinean jarraitzen dugu).
Orain, beste 16 bulegotan ezarri nahi dute eredu berri hau langileon ordezkaritzarekin negoziaziorik izan ez denean, bulegoetako langileei derrigorrezko prestakuntza ikastaroak antolatuz, eta hau guztia aurrera eramateko beharrezkoak diren tresnak edo azpiegitura prest izan gabe. Are gehiago, aurkitzen ari diren oztopo guztiak gainditzeko, inprobisatzera behartuta daude momentu oro, ezarpen honen zentzugabekeria agerian utziz.
Gainera, Lanbide-eraldaketa (Arreta Eredu berria barne hartzen duena), Legebiltzarrean aurkeztu gabe dago, talde parlamentarioek aztertu eta baloratu dezaten.
Beraz, sindikatuok Arreta Eredu horren ezarpena gelditzea eta benetako negoziazio bati lehenbailehen ekitea eskatzen dugu.
Hurrengo egunetarako honako ekintzak adostu ditugu sindikatuok:
* Legebiltzarreko taldeei bilera bat premiaz egiteko eskatzea, Lanbideko Arreta Eredu Berriari beren sostengua ez emateko eskatzeko.
* Funtzio Publikoarekin eta Enplegu Sailarekin bilera eskatzea, gure azalpenak emateko, eta sortzear dagoen gatazka honetan esku hartzeko eskatzeko.
* Elkarretaratzeak bulegoetan.
Datozen asteetan asanbladak antolatuko ditugu Lanbideko zentroetan egoera aztertzeko.