Espainiako Gobernu Ordezkaritzaren aurrean elkartu gara, LAB, ELA, UGT, ESK, STEILAS, CGT/LKN, CNT, EHNE, HIRU eta ETXALDE sindikatuok abian abiatutako dinamikaren harian.
Abenduan aurkeztu genuen “Konponbide garaia da, orain presoak” Bilbo mailako dinamika. Ordutik hona, bost aldiz mobilizatu gara 10 sindikatu hemen, Espainiako Gobernu Ordezkaritzaren aurrean, aldarrikapen zehatz batzuekin:
1. Egungo egoeran, preso dauden pertsonen arazoa konpontzea bizikidetza demokratikoa eta adiskidetzea sustatzeko beharrezko ekarpena litzatekela uste dugu.
2. Beraz, arazo honen konponbide orokorra lortzeko asmoz, honako urratsak beharrezkoak lirateke.
a) Gaitz larriak pairatzen dituzten presoen arazoa dela eta, iazko uztailaren 5ean egindako eskaerari berretsi egiten diogu: ”Sindikatuok agintariei estatuan indarrean dagoen legedia eta nazioarteko irizpide zorrotzenak aintzat har ditzaten eskatzen diegu, gaitz larriak edota sendaezinak pairatzen dituzten presoak hirugarren graduan sailkatzeko edo espetxetik ateratzeko, duintasun pertsonal eta gizatasun arrazoiak direla eta”.
b) Espainia eta Frantziako gobernuei preso guztiak Eusakl Autonomia Erkidegoa (EAE) eta Nafarroako espetxeetara ekar ditzaten exijitzen diegu, espetxe zigorra presoaren sorlekutik urruti ez betetzeko eta senideekiko lotura errazteko.
c) Preso bakoitzaren baldintza eta egoera zehatzak benetan aztertuz, lehen gradutik bigarren gradurako bilakaera eskatzen dugu, espetxe legediak zehazten duen moduan.
Gizarteari, eta bereziki langileei, bakoitzak bere eremutik, auzi honen behin betiko konponbidea lortzeko lana egin dezan deia luzatzen genien ere.
Gaurkoan, modu berezian oroitu nahi dugu Txus Martin larriki gaixorik dagoen Basauriko presoaren egoera, azken egunetan berak eta bere senideek jasandako tratu gizagabea salatu eta berehala askatzea eskatuz.
Euskal presoen giza eskubideen errespetua eskatzen dugu, bereziki, osasuna eta bizitzeko eskubidea. Espetxe politikaren aldaketa eskatzen dugu, larriki gaixo diren presoei dagokionean, dagokien tratamendua espetxetik kanpo eta senideekin jaso ahal izateko.