Bertoko gehiengo sindikal eta sozialaren borondateari jaramon egin beharrean PNVk gobernatzen duen Jaurlaritza eta UPNk zuzentzen duen Nafar Gobernua, otzan otzan funtzio publikoan Madrildik inposatako murrizketa guztiak ezartzen ari dira. LABek bi gobernuei gure lan baldintzak bertoko ordezkaritza sindikalarekin etan inolako mugarik ezarri gabe negoziatu ditzatela eskatzen die.
Berton negoziatzeko eskubidea orain!
Irailaren 26an CCOO, UGT, CSIF, CIG eta ELAk parte hartu zuten Espainiar Estatuko Funtzio Publikoko negoziazio mahaia burutu zen Madrilen (LABek negoziazio marko hau euskal langileoi inposatuagatik printzipioz errefusatu egiten du).
Bilera horretan aurtengoan soldaten izozketa ezarriko zigutela, lanpostuen erreposizio tasa berriro ere hutsaren pare utzi eta ordezkapenen mugatzea ezarriko zigutela adierazi zieten sindikatu hauei.
Hurrengo egunean bilera horretan azaldutakoa Ministroen Kontseiluan onartu zuten eta Estatuko 2014ko Aurrekontuen Legearen Zirriborroan jaso zuten.
Honetaz gain, Estatuko 2014ko Aurrekontuek zerbitzu publikoen sistema kolokan jartzen duten bestelako neurriei ere eutsi egiten zaie: hala, medikamentuen berrordainketa mantendu egiten da, osasun sistemaren unibertsaltasun ezari ere eutsi, menpekotasun egoeran diren pertsonak zaintzeko sisteman berrordainketa handitu egiten da, justizia sistemaren berrondainketari eutsi, …
Bien bitartean Hego Euskal Herriko bi gobernu nagusiek, PNVk gobernatzen duen Jaurlaritza eta UPNk zuzentzen duen Nafar Gobernua, otzan otzan murrizketa guzti hauek ezartzen ari dira. Bertoko gehiengo sindikal eta sozialaren borondateari jaramon egin beharrean Espainiar Estatuak ezarritakoa betetzen dute gure borondatearen kontra. Marko juridikoak behartu egiten dituela erabiltzen dute aitzakiatzat, baina praktikan alde bakarrez neurri hauek aplikatzen dituzte eta egiten badute neurriok konpartitzen dituztelako baino ez da, bestela jaramon egin diezaiotela bertoko gehiengoak adierazitako borondateari eta borrokatu dezatela marko juridiko honek ezartzen dituen mugak gainditu eta negoziatzeko eskubidea eskuratu dezagun.
Alde horretatik salatu behar dugu PNV eta PSEk Jaurlaritzari egonkortasun instituzionala bermatzeko sinatu berria duten Itunak (zeina PPk ere gerora babestua izan den) Estatutik datozen aurrekontu hauekiko menpekotasunean sakontzea besterik ez duela ekarriko. Izan ere, gogoratu behar baita Itun hau sinatu aurretik PSEk lanaldia handitzea ekarri zuen dekretua atzera botatzeko legez besteko proposamen bat sustatu zuela Legebiltzarrean, eta PNVrekin sinatutako Itunean horrelakorik ez dela jasotzen, eta beraz, bere garaian oposizioan zela egindako eskakizun hori bazterrera bidali duela PSEk.
LABek aspaldi ohartarazia du gure lan baldintzak negoziatzeko aukerarik eskuratu nahi badugu, eta gure zerbitzu publikoen sistema propioa eraiki nahi badugu halabeharrez herri bezala burujabetza ekonomikoaren bidean aurrera egin behar dugula. Euskal Herrian gehiengo sozial eta sindikal oso bat dago norabide honetan urratsak emateko prest. Zeren zain daude Jaurlaritza eta Nafar Gobernua?
Zoritxarrez bai PNVk baita UPNk ere, langileokin ez negoziatzeko alde bakarreko inposizioak darabiltzaten bitartean, Espainiar Gobernuarekin akordio bilateralak egiteko prestutasuna azaltzen dute.
Bada, hautu hori egiten duten bitartean, LABek gobernu hauekiko konfrontazioa besterik ez du artikulatuko, eta hala, negoziazio mahaiak guretzat konfrontaziorako gune baino ez dira izango. Bertoko gobernuei gauza oso sinple bat exijitzen diegu: gure lan baldintzak negoziatu ditzatela bertoko ordezkaritza sindikalarekin eta inolako mugapenik aldez aurretik ezarri gabe, horretarako lehen-lehenik indarrean beharko luketen eta betetzen ari ez diren hitzarmenen eduki guztiak bere horretan bete ditzatela exijituko diegu.
{module[111]}