Atzo Madrilen Hezkuntza Ministroa eta Erkidegoetako Kontseilariek burututako bileratik denak konforme atera ziren, hori da behintzat komunikabide ezberdinetan jasotzen dena. Harrigarria eta kezkagarria iruditzen zaigu: LOMCE legea betetzeko konpromezua hartuta alde egin baitzuten.
EAEko Cristina Uriarte sailburuak argi adierazi zuen, “lege organikoaren atal kaltegarrienak sahiestu nahi ditugu” legeari bide emanez. Eta Nafarroan izendatu berri den kontseilariak kargu hartu zuenean LOMCEa ez aplikatzeko lehentasuna adierazi zuen ordea, baina atzoko bileraren ostean nahi honen arrastorik ez dugu ikusten.
Ezin dugu ahaztu Nafarroan UPNk ikasturte amaierarako lege organikoa aintzat hartuta ikas maila guztietarako dekretuak onartu zituela eta Bizkaia, Gipuzkoa eta Arabarako Heziberriren Curriculuma osatua dagoela, Lomce oinarri hartuta. Hortaz, Lehen hezkuntzako ebaluazioetan, Espainiatik definitutako edukiak ebaluatuko dira. Hortaz, nola egon daitezke konforme? Atzoko bileratik ez da inolako momentuan LOMCEa kolokan jartzen ez bertan behera geratzen.
Konforme akordioa lortu dutelako non eta Madrilen baina bitartean hezkuntza komunitateari muzin egiten jarraitzen dute, gure ustez bai lomceri bai bestelako legeei aurre egin ahal izateko akordioak Euskal Herrian eraiki behar dira, bertako herritar eta eragileekin. Euskal Herriak dituen hezkuntza behar eta nahiei erantzungo dioten hezkuntza politikak garatuz. Eta LABen ustez, Euskal Herri osorako hezkuntza sistema propioaren norabidean urratsak emanez.