Apirilaren 30ean egin dugu EUDELen azken negoziazio mahaia, eta bertan ez da Udalhitz berritzeko akordiorik lortu. Mahaia, udal hauteskundeen ondoren bilduko omen da berriro. LABen iritziz, EUDELen eskaintza eskasa izan da. Udalhitzen inguruko akordio partzial bat baino ez dute mahai gainean ipini eta hori ez da, inondik inora, negoziazio kolektiboa berreskuratzea.

LABek, negoziatzeko plataforma aurkeztu zuen orain dela urte bete baino gehiago (2014ko martxoaren 10ean) baina EUDELek zoritxarrez, ez du gure proposamena negoziazio oinarritzat hartu. Orain, aste gutxi batzuetan, EUDELen proposamena eta egutegia abiapuntuak izanik eta udal hauteskundeak atarian ditugula, akordio bat lortu nahi izan dute. Honek guztiak, jakina, kutsu elektoralista dauka gure iritzian.

Bestetik, salatu nahi dugu EUDELen dauden alderdi batzuen jokoa ez zaigula onargarria iruditzen. Arazo legalak aipatzen dituzte sarritan, baina aitzakia ederrak dira, beraiek baitira lege horiek egiten dituztenak.

Hala ere, LABen jokabidea serioa izan da eta gure ekarpenak egin ditugu. LABek akordioak blindatzeari ezinbestekoa deritzo eta, horrenbestez, lege edota aurrekontu-zailtasunen aurrean, konpromiso irmoa eskatu dugu hitzartutakoa betetzeko eta instituzioek aldebakarreko erabakirik ez hartzeko.

Negoziazio osoan zehar, udal mailako itunak bultzatu nahi izan ditugu udaletan galdutako enplegu publikoaren berreskurapena eta enplegu publikoa sortzeko. Era zuzenean, langile publikoek emango dituzten kalitateko zerbitzu publikoen eredu berria sustatu nahi izan dugu. 2010etik galdutako eroste ahalmena berreskuratzeko proposamena luzatu diogu EUDELi. Argi utzi dugu lan osasuna ez dugula esku pribatuetan ikusi nahi. Benetako borondatea eskatu dugu Euskara eta Berdintasun plan eraginkorrak sustatzeko….. emaitza, zoritxarrez, ez da izan langileok merezi dugun neurrikoa.