Bere bidea jarraitzen du Euskal Herriko Eskubide Sozialen Karta osatzeko prozesuak. Urriaren 5ean Donostian burututako hirugarren nazio asanbladaren ondoren, zeinetan kartaren eztabaidarako zirriborroa onartu baitzen, herri eta eskualdeetara hedatuko da prozesua datozen hileotan. Zirriborro honek Kartaren printzipio, eskubide eta aldarrikapenen lehen zerrenda jasotzen du.

Prozesuaren jarraitzeko, herri eta eskualdeetako eztabaida saioak dinamizatuko dituzten kideekin metodologiari buruzko mintegiak burutu dira Bilbo, Donostia, Gasteiz eta Iruñean gaur goizean. Hamarnaka izan dira partehartzaileak, eragile ugari eta anitzetakoak, eta trebakuntza espezifikoa jaso dute eztabaidak girotu eta dinamizatzeari begira. Bertaratutakoek oso positiboki baloratu dituzte landutako dinamikak eta ezagututako teknikak.

Eskubide Sozialen Kartak gehiengo sozial baten mesedetan egongo den eredu berri bat definitzeko beharrezkoak diren proposamen eta alternatibak jaso beharko ditu, eta beraz ezinbestekoa izango da herritarren parte hartzea honen eraikuntzan, ahalik eta zabalena. Horretarako, prozesuan inplikatutakoek jendartearen ahalik eta esparru handienera iristea dute helburu, eraikitzen ari den Kartak euskal herritarron borondateari erantzun diezaion.

Hori horrela izanik, eta eztabaida ahalik eta zabalena eta parte-hartzaileena izate aldera, eskualde eta herrietan eztabaidatzeko metodologiak ezaugarri hauek jasotzen ditu. Datozen asteotan zehaztuko dira eskualde bakoitzeko deialdi eta hitzorduak. Argibide guztiak www.eskubidesozialenkarta.com blogean egongo dira eskuragarri.

Herri eta eskualdeetako eztabaiden ondoren, Karta osatzeko prozesuaren hurrengo mugarria abenduaren 14ean burutuko den IV. Asanblada izango da. Bertan, Kartaren lehen bi atalak itxiko lirateke, hitzaurrea eta printzipioak. Hiru eta laugarren atalen eztabaidaren itxiera (eskubideak-aldarrikapenak eta tresnak), herri eta eskualdeetako eztabaidaren bilakaeraren araberakoa izango da.
  

LAB sarean
{module[111]}