2024-02-26
HomeIdazkaritzakEuskara IdazkaritzaEskolan euskaraz egindako ikasketa ofizialak aitortzeko dekretuari buruz, LABen prentsa oharra

Eskolan euskaraz egindako ikasketa ofizialak aitortzeko dekretuari buruz, LABen prentsa oharra

Gaur aurkeztu da ofizialki Funtzio Publikoaren Euskal Kontseiluan “Eskolan euskeraz egindako ikasketak aitortzeko eta euskarako hizkuntza tituluak eta ziurtagiriak egiaztatzetik salbuesteko” dekretua.
Salatu nahi dugu dekretu honen berri hedabideetan aurkeztu zutela, baina gaur arte ez diotela eragindako ezein eragileri ofizialki aurkeztu, eta gaurkoan sindikatuoi bai, baina euskalgintza eztabaida garrantzitsu honetatik kanpo utzi dutela.

Hala, LABek, dekretuaren gainean eztabaida sozial handiagoa egin behar zela uste du. Kontseiluaren bilkura honek, prozesuaren bukaera izan beharrean, eragileen partehartzea aurreikusten duen prozesuaren hasiera izan behar zuen, eta horregatik eskatu dugu proiektua mahai gainean gelditzea. Jaurlaritzak ezezkoa eman du eta hartara LABek abstentziora jo du.

LABen ustez dekretuaren helburua ona izanik ere eta guk helburuarekin bat eginda ere –eskolan euskaraz egindako ikasketak balioztatzea eta Administrazioaren Hizkuntza Eskakizunak egiaztatzeko beharrizanetik salbuestea– ezin dugu bere horretan onartu: arestian esan bezala parte hartze eskaseko prozedura arrazoiengatik baina baita bere edukiek dekretuaren helburua ezinezko egiten dutelako.

Izan ere badira helburu hori betetze aldera dekretuak aurreikusi eta jaso beharko lituzkeen eta betetzen ez dituen zenbait kontu: gaur egun Hezkuntza Sailak berak egindako azterketek beraiek ere islatu duten bezala, eskolak ez du betetzen ikasleek euskararen ezagutza maila nahikoa izatea, ez behintzat A eta B ereduan, beraz lehen-lehenik dekretuak egoera hau gainditzeko zer bitarteko jarriko diren edota zer erabaki hartzen den jaso beharko luke (gure ustez ereduen sistema gainditu beharko litzateke), bestetik eskola garaian zehar euskararen ezagutza eta trebatze maila neurtzeko tarteko moduak ere jar litezke. Seguruenez behar bezalako eztabaida eta parte hartze prozesu egoki batek korapilo hauek askatuko lituzke baina Jaurlaritzak ez du horretarako borondaterik azaldu.

LABek, halaber, garbi adierazi nahi du Euskal Herriak administrazio eta zerbitzu publiko euskaldunak behar dituela eta, norabide horretan, langile berriek ezinbestean euskara ezagutu behar dutela lan eta zerbitzu publikoa egin eta emango badute. Orain arteko hizkuntz eskakizunen sistemak porrot egin du xede horretan, eta gainera ez dago ez aurreko gobernuen eta inolaz ere ez gobernu honen aldetik borondate politikorik egoera hori aldatzeko.

Beraz, hau da gobernuek oraindik ere gainditu gabe duten eginbeharrik garrantzitsuena: euskararen erabateko normalizazioa lortzeko plan estrategikoa, azken batean gogoratu behar baita EAEko administrazioan euskararen erabilera %3koa baino ez dela eta herritarrei zerbitzuak euskaraz ematetik oso-oso urrun gaudela. Zentzu honetan gure kezka azaldu nahi dugu PSE-PPko Gobernu honek Legebiltzarrean aurkeztu nahi duen Funtzio Publikoaren Euskal Lege berrituaren proiektuan ez baita jasotzen euskarak gure funtzio publikoan bete beharko lukeen zehar-lerroko funtzio eta horren araberako garrantzia.

Gasteizen, 2011ko abenduaren 14an

AZKEN ALBISTEAK | ÚLTIMAS NOTICIAS

LABek Nafarroa Garaian inoizko emaitzarik onenak lortu zituen 2023ko hauteskunde sindikaletan: 1.223 delegatu ditu eta %18tik hurbil dago

Nafarroako Gobernuak azkenean zabaldu dituen emaitza ofizialen arabera, LAB sindikatuak maximo historikoak lortu zituen 2023ko hauteskunde sindikaletan. Azken datuen arabera, LABek 1.223 delegatu ditu Nafarroa Garaian, eta %17,96ko ordezkaritza. Lau sindikatu nagusien artean, azken urtean LAB izan da delegatu kopuru gehien lortu dituena, bai eta ehunekoan gora egitea lortu duen bakarra ere.

Bizkaiko grafikagintzako patronalak atzerapauso gehiago dituen proposamena egin berri du

Otsailaren 22an, Bizkaiko grafikagintzako hitzarmeneko bederatzigarren negoziazio bilera egin da. Patronalak proposamen berri bat aurkeztu du, aurretik aurkeztutakoak baino baldintza txarragoekin honeko edukietan: iraunaldian, soldata igoeretan eta oporretan. Era berean, atzerapausoak mantentzen jarraitzen dute honako gaietan: lanaldiaren banaketa irregularrean, antzinatasuna, aldi baterako ezintasunen osagarriak, etab.

Mecanerreko trantsizio ekosozialerako plana aurkeztu dugu

Enpresa-batzordean gehiengoa dugun LAB eta ESKk enpresaren trantsizio-planaren jendaurreko aurkezpena egin dugu Urdulizko Kultur Etxean. Enpresaren itxiera saihesteko eta haren etorkizuna ziurtatzeko egindako txostena eta trantsizio ekosozialerako proposamenak ezagutarazi ditugu. Plana enpresa batzordeak egin du Garua kooperatibaren eskutik, eta Urdulizko Udalaren laguntza izan du.