2024-06-18
HomePentsio erreformaEskola Garraioetako langileen borrokak lan erreformatik blindatzen duen akordioa lortzea ahalbidetu du

Eskola Garraioetako langileen borrokak lan erreformatik blindatzen duen akordioa lortzea ahalbidetu du

ELA, LAB, CCOO eta UGT sindikatuok Eskola Garraioan lortutako akordioaren balorazio oso positiboa egiten dugu. 10 greba egun eta mobilizazio ugari egin ostean hitzarmena lan erreformatik blindatzea lortu dugu. Borrokak merezi du.

ELA, LAB, CCOO eta UGT sindikatuetatik urtebete daramagu negoziatzen Eusko Jaurlaritzaren Hezkuntza, Hizkuntza Politika eta Kultura Sailaren menpeko eskola-garraioko laguntzaileen eta jolastokietako zaintzaileen hitzarmen kolektiboa.

Aldi horretan zehar bilera ugari egin dugu sektorea kudeatzen duten enpresetako ordezkariekin, alde bien ikuspuntuak hurbiltzeko asmoz; baina emaitza ez da emankorra izan.

Negoziazio-mahaia iazko otsailaren 4an eratu zen.

Eta edukiekin ados jarri garen lehenengo bilera aurtengo otsailaren 3koa izan da.

Iazko ekainean negoziazioa blokeaturik zegoela ikusita, lanuzteak egitea erabaki genuen batzarrean.

Hori zela-eta, enpresek konpromiso bat hartu zuten: hitzarmenaren aplikazioa luzatzea 2013ko abenduaren 31ra arte.

Eta horri esker negoziatzen jarraitu ahal izan genuen.

Baina abenduaren 31 ere heldu zen… eta negoziazioak ez zuen aurrera egiten. Eguberritako oporretatik bueltan, 5 eguneko greba-deialdia egin genuen, eta urtarrilaren 27tik aurrera greba mugagabea.

Hori horrela, abenduaren 20an jakinarazi genien bai Lan Ordezkaritzari, bai enpresei, lanuzteak egiteko erabakia, egoera berroneratzeko denbora nahikoa emanez, zeren grebaren lehen eguna urtarrilaren 13a izango zen.

Erantzunik jaso ez genuenez, langileak antolatu ziren, eta egoeraren berri eman zieten gurasoei.

Gainera, EHIGErekin ere jarri ginen harremanetan, eskola-garraioaren egoera jakinarazteko; eta erantzun ziguten ahaleginduko zirela gure mezua helarazten gurasoen elkarteei, eta Hezkuntza Sailekoekin ere hitz egingo zutela.

Urtarrilaren 31n Lan Sailetik deitu ziguten Lakuara joateko, eta han sektorearen eskakizunak zein diren haiei azaltzeko, eta enpresen aldetik gatazka konpontzeko zegoen kezka guri agertzeko.

Langileen aldetik beti egon gara prest negoziatzeko, eta behin enpresen interesa ikusita, bilerak egiteari ekin genion, eta otsailaren 3an aurre-akordio bat lortu genuen.

Aurre-akordioaren edukiak berretsi dira batzarretan Bizkaian, Gipuzkoan eta Araban. Eta horrek bide ematen digu behin betiko akordioa sinatzeko.

Aurre-akordioaren edukiak azaltzen hasi baino lehen, beharrezkotzat jotzen dugu azpimarratzea zergatik lortu dugun arrakasta azkenean: sektoreko ekintza sindikala, eta gure langile-kidegoak egindako 10 greba-egunak eta elkarretaratze eta mobilizazio ugariak. Berriz ere frogatu da beste hainbatetan ikusi duguna: langileriak bere burua antolatzen badu, hobetu egiten ditu bere lan- eta gizarte-baldintzak.

Sinaturiko akordioaren edukiak:

Indarraldia: 2009ko irailaren 1etik 2016ko ekainaren 30era arte.

LAN-ERREFORMATIK BLINDATZEA: Aurrera-eragin mugagabea, hitzarmena salbuesteko aukerarik ez, eta malgutasunik ez.

Aurreko hitzarmenaren artikuluak errespetatuko dira, eta baita Arabako, Bizkaiko eta Gipuzkoako eranskinak ere.

SOLDATA

2009/2010 ikasturtetik 2012/2013 ikasturtera, 0 igoera.
2013/2014 ikasturtean, %3ko igoera.
2014/2015 ikasturtean, %2ko igoera.
2015/2016 ikasturtean, %2ko igoera.

Gure helburua eskola-jantokien hitzarmenaren parean jartzea zen —zuzeneko kudeaketa—. Hori izan da gure erreferentzia sektorearen hastapenetatik. Soldata-igoera horiek kontuan hartuz, kolektibitateen sektoretik puntu bat gora jarriko gara.

Lortu dugun akordioari oso ondo deritzogu. Eskola-garraioko sektorea osatzen duten gehienak emakumeak dira.

Antolatu gara eta borroka egin dugu dagokigunaren alde.

Eta bidea ez da erraza izan.

Baina gaur beste sektore batzuei esateko moduan gaude borrokak merezi duela. Zorionak gure borroka honetan parte hartu duzuen langile guztioi!

 

RSSakLAB Facebooken

 

 

AZKEN ALBISTEAK | ÚLTIMAS NOTICIAS

Nafarroako etxebizitzen alokairuari buruzko datuek erakusten dute premiazkoa dela gaia legez arautzea eta parke publikoa zabaltzeko konpromiso handiagoa hartzea

Iragan ortziralean Nafarroako Estatistika Institutuak Etxebizitza alokatzeari buruzko estatistika argitaratu zuen. LAB sindikatuaren iritziz, ikerketa horrek berresten du merkatuak ez duela alokairuaren prezioa behar bezala erregulatzen eta premiazkoa dela lege eta administrazio neurriak hartzea. Azterlan horren arabera, alokairuaren hileko batez bertzeko prezioa 541,6 eurokoa da, baina azterketak berak onartzen du datu horrek ez duela islatzen alokairuko etxebizitza bat eskuratzeko prezio erreala, etxebizitza librearen prezioa askoz ere garestiagoa baita.

Gernikako Ospitalean erizainen eta erizaintzako laguntzaileak falta direla eta egoera kritikoa dela salatu dugu

Larrialdietako paziente kritikoei arreta ematean, triajean eta boxetan dauden pazienteen segurtasuna arriskuan jartzen da.

Eskola garraioaren hitzarmena desblokea dezatela exijitzeko mobilizazioa egin dugu

Kolektibitateen sektoreko patronalaren enpresetako bat den Eulenen aurrean izan da elkarretaratzea, Eusko Jaurlaritzako Hezkuntza Sailaren mendeko ikastetxeetako eskola-garraioko eta jolastokiko zaintzaileen hitzarmen kolektiboaren negoziazioaren blokeoa salatzeko.