Ernaiko, Sortuko eta LABeko kideek agerraldia eskaini zuten atzo jasaten ari diren jazarpen eta espioitza politikoa salatzeko. Ernaiko kideek, euren egoitza baten aurrean aurkitutako espioitza tresnak erakutsi dituzte.
Snowden kasuak majo astindu ditu hautsak mundu guztian. Eskandalua zabaldu da herrialdez herrialde goi agintariei egin zaizkien entzuketak direla-eta, herrialde horiek egingo ez balituzte bezala edo jakinaren gainean egongo ez balira bezala.
Asteburuan zenbait mediotan zabaldu da ezker abertzaleko kideok espioitza etengabearen biktima garela. Ez da berria zoritxarrez. Atzo Kongresuko segurtasun batzordean azalpenak eman behar izan zituen Félix Sanz Roldán CNIko zuzendariak. Lotsa zer den jakin gabe gezurra bota zuen herritarron aurpegira barre eginez. CNIk ez omen ditu politikariak zelatatzen. Baina telefono entzuketak espioitza eta jazarpenaren izebergaren punta baino ez dira.
Aste honetan bertan Ernai gazte antolakundeak erabiltzen duen lokal baten ate aurrean aparatu hau aurkitu dugu, Lokalaren atera zuzenean enfokatutako kamera bat eta entzungailua. Ez da berria Ernaiko kideok zein ezker abertzaleko kideok jasaten dugun jazarpena. Ezker abertzalekook etengabe izaten dugu kalez jantzitako polizia atzetik, espresuki jarritako kontrolak edota telefono deien entzuketa jazarpen horren adibide batzuk baino ez dira.
Honek frogatzen du beraz gezurretan ari dela CNIko zuzendaria eta Espainiako Gobernua.
Zer dio Espainiako Gobernuak honi buruz? Gezurrak esaten jarraitu behar du? Zer dela eta halako espioitza sareak gure aurka? Ernai proiektu politiko eraldatzaile baten alde eta gazteon arazoei aterabideak emateko sortutako antolakundea da. Beraz, guztiz salatzekoa da halako jazarpena pairatzea.
Gogor salatu nahi dugu jarduera hau. Antolatzeko eta biltzeko eskubidearen aurkako atentatu larria da hau, nahiz eta normaltasun itxura eman nahi duten batzuek. Konponbidearen bidean urratsak eman behar ditugu. Eta hobe lukete ezkutuan ibili ordez, mahaiaren bueltan denok eseri eta aterabideak adostuko bagenitu.
Beraz, Ezker Abertzaleko kideongan ezarritako jazarpena bertan behera geratzea exijitzen dugu eta Euskal Herriko alderdi politiko nahiz eragile ezberdinei eskubide urraketen aurrean arduraz jokatzeko eskatzen diegu.
{module[111]}