Gaur, maiatzak 28, Gipuzkoako eraikuntzan eman den akordioa kapitalizatzeko ELAren protagonismo-irrikak, LABekin zeukaten ituna urratzera eta enpresarien proposamena onartzera eraman ditu, sektoreko langile guztiontzat hobea gertatuko litzatekeen akordioa eragotziz.

Egia esateko, gaur izenpetu duten aurreakordioa hobetu zitekeen. Gaurkoa izan da da lehen aldia ADEGIk testuak aurkezten dituena. Gainera testuak zalantza juridikoak sortu ditu mahaian alde ezberdinen artean testu horien eraginaren inguruan. Hortaz, LABek bere zerbitzu juridikoekin testu hauen balioa aztertuko du eta horregatik gaurkoan ez du aurreakordioa sinatu.

Akordio honetan LABek babestu dituen alderdi onuragarri batzuk jasotzen badira ere (adibidez, hitzarmenari ez lotzearen aurkako klausula, hizkera sexistarekin amaitzea, bideetako langileak subrogatzeko eskubidea hobetu izana), ez da egia honetan jasotzen den soldata-igoerak langileen eros ahalmena berreskuratzen duenik.

Egitekotan, galdutakoaren erdia ere berreskuratuko ez lukeelako eta akordioak ez duelako bermatzen hitzarmena ezarriko dela, ez baita guk eskatzen genituen eta inolako kostu ekonomikorik eragiten ez duen neurririk jasotzen hitzarmenen ez-betetzeak saihesteko (aparteko orduak ezabatu eta/edo kontrolatu, obretako irteeren eta sarreren kontrola, lan egutegia, lan parteak edota bitarteko prebentiboen formakuntza). Gainera, batzordeak ezin izango ditu obrak ikuskatu hitzarmena betetzen dela zaintzeko. Prekarietatearekin amaitzeko bestelako neurririk ere ez da jasotzen hitzarmenean.

Gaur goizean batzartu da LAB bere ordezkariekin, patronalaren proposamena aintzat hartzeko eta sindikatuaren jarrera erabakitzeko, aurreikus zitekeen ELA sindikatuaren sinaduraren harira. Ordezkariek aho batez adierazi dute ELArekin landu genuen proposamen bateratuaren defentsan berresten direla, eta hura hobetzearren mobilizatzeko eta grebak egiteko konpromisoarekin. Halaxe jakinarazi diogu ELA sindikatuari. Hala eta guztiz ere, behin ELAk, sinatu ondoren, hura hobetu ahal izatea eragotzi duenez, LABek testuaren baligarritasun juridikoa baieztatzen duenean, sinatu egingo du hitzarmena.

Akordioa oraindik hobetu zitekeen arren, LABek bakarrik lortu dituen gaiak ere jasotzen dira: KPIren gaineko igoerak (LABek bakarrik adierazi zuen mahaian KPIa ez-nahikoa zela), hitzarmena bermatzeko batzordera joango ez diren enpresei ordainak etengo zaizkiela (ELAren hasierako proposamenean ez zen ezertxo ere jasotzen), eta hizkera sexista baztertu da. Ez dugu onartuko batzuk besteen lorpenez jabetu nahi izatea.

ELA eta LAB elkarrekin mobilizatuz gero, aurreakordioa hobetuko genukeela ez dugu zalantzarik. Aukera on bat galdu dugu.