LAB sindikatuaren ordezkaritza bat La Habanan izan da Fidel Castro Ruzen jaiotzaren 100. urteurreneko ekitaldietan. Iraultza kubatarraren buru izandakoari buruzko konferentziaren testuinguruan, gure elkartasuna adierazi nahi izan diogu uharteari, AEBetako inperialismoak ofentsiba berritu eta herrialdea egoera lazgarrian utzi duen unean.
Kubako herriak azken ia 70 urteetan pairatu duen blokeoa are eta gehiago estutu dute azken urtean. Inperialismo iparramerikarrak ez du Kubako herriaren burujabetza onartzen, eta estrategia genozida bat jarri du martxan, irlak amore ematea helburu duena. Blokeo bortitz horren eraginez Kubako herria bizi baldintza ezin kaskarragoak sufritzen ari da. Horregatik, orain, inoiz baino gehiago, ezinbestekoa da elkartasun internazionalista ere biderkatzea.
Fidel Castrori buruzko kongresua
Kubako buruzagiaren pentsamendu politikoa lantzeko antolatu den nazioarteko lehen kongresuan parte hartu ahal izan dugu, beste 1.500 ordezkariekin batera. Hiru egunez, Fidel Castrok nazio askapenerako borroka sozialista zuzentzean utzitako irakaspenak landu ahal izan ditugu, beste hainbat herrialdetako kideekin batera. Bi ardatz presente izan zituen beti Castrok: printzipio sozialisten irmotasuna eta irlaren burujabetza. Irakaspen horiek bizirik diraute.
Elkartasun dinamika
Irlara bidaia baliatuta William Soler ospitale pediatrikora bisita egiteko aukera ere izan dugu. Ospitale horretan jarriko dira Euskal Herriko elkartasunari esker finantzatu diren eguzki plakak. Ospitaleko zuzendaritzarekin izandako bilera emankorraren ondoren, bidaia honetan eramandako maleta solidarioak banatu ziren, Kubako herritarrei medikamentuak helarazteko helburua dutenak.
