Iruñeko El Corte Ingles enpresak bi langile kaleratu ditu egun batetik bertzera, modu erabat bidegabean. LABen iritziz bi kaleratze horiek akusazio faltsu gogorrekin egin dituzte eta helburu zehatz bat dute: gainontzeko langileak beldurtzea. Kaleratze hauek ez dira kasualitatea izan, langile hauek euren eskubideak aldarrikatu egin dituzte beharrezkoa ikusi dutenean eta, bistan denez, El Corte Ingles bezalako enpresa batek ez ditu horrelako langileak nahi.
Horrelako jarreren aurrean erantzun bat ematea beharrezkoa dela uste du LABek, langileek ikus dezaten ez daudela bakarrik eta borrokatzeko prest gaudela erakusteko ere. Zigor kaleratze hauen atzean gainera, langileen duintasuna txikitzea bilatzen dute, zigor morala ezartzea eta kaleratzea musu-truk izatea, eta horregatik guztiagatik guztiz onartezinak dira.
Azkenik, LAB sindikatuak Enpresa Batzordearen jarrera ere salatu nahi du. Batzordean dauden sindikatuek -FETICO, FASGA, UGT eta CCOOk- ez dute ezer ere egin kaleratze hauen aurrean; ez dira mobilizatu, ez dute salaketarik egin, ez dute protestatu, ez diete kaleraturiko langileei batere elkartasunik adieraz. Enpresaren eskutik joan dira, bertze behin ere.