2024-06-14
HomeIndustriaMetalgintzaGarbiñe Aranburu: “Hitzarmen sektorialen defentsan, borroka da bidea”

Garbiñe Aranburu: “Hitzarmen sektorialen defentsan, borroka da bidea”

Hirugarren greba eguna gaur Bizkaiko metalgintzan. Eta erantzuna, aurreko egun bien antzerakoa, %80tik gorakoa. 11:30ean manifestazioa egin dute Bilbon, Jesusen Bihotzetik FVEM Bizkaiko metalgintzako patronala kokatuta dagoen Euskadi Plazaraino. Garbiñe Aranburu LABeko idazkari nagusiak Bilboko manifestazioan parte hartu du, sektoreko hitzarmenaren alde eta beraien sektoreko hitzarmenaren defentsan Bizkaiko metaleko langileak aurrera eramaten ari diren borroka babesteko.

Adierazi du azken bi lan erreformek gogor kolpatu dute euskal langileon negoziazio kolektiborako eskubidea, batez ere sektoreko hitzarmenetan oinarritutako euskal langileon negoziazio eredua erasotuz.

“2010ean PSOEren gobernuak negoziazio kolektiboa zentralizatzeko lan erreforma egin zuen, sektore hitzarmenak jipoituz. Eta 2012an PPren zentralizazioa bere horretan utzi zuen, enpresa hitzarmenei lehentasuna eman zien eta patronalari ia erabateko aldebakartasuna eman zion. Honela, euskal langileon negoziazio kolektiborako eskubidea kolokan utziz”.

LABek, hasieratik, “jarrera argia” izan duela gaineratu du, urte hauetan koherentzia horri eutsi diola azpimarratuz. Jarraian, erreformetatik sindikatuak ateratako bi ondorio nagusiak zehaztu ditu.

Batetik, negoziazio kolektiborako marko propioaren aldeko borroka indartu beharra, estatalizazioari mugak jartzeko negoziazioa blindatzeko egondako akordio saiakera desberdinetan parte hartuz.

Bestetik, hitzarmenak lortzeko, patronalaren erosotasuna apurtu beharra. “Horretarako mobilizazioak eta grebak behar beharrezkoak dira. Azken bi urte hauetan, negoziazio kolektiboan egon den blokeo egoera apurtzea lortzen ari gara eta datuek erakusten dutena da konfliktibitatearen igoera eta hitzarmenen desblokeoa eskutik doazela”.

Bizkaiko metalgintzako hitzarmenaren aldeko borrokaren helburuak ere zehaztu ditu jarraian, “gaur hemen gaude Bizkaiko metalean sektore hitzarmen duin baten alde. Erreformei aurre egingo dien hitzarmena, KPIaren gainetik egongo diren soldata igoerak bermatuko dituen hitzarmena, metalean emakumeek bizi duten diskriminazio egoerei (kontratazioan, soldata arrakala…) mugak jarriko dizkien hitzarmena, subrogazioa bermatuko duen hitzarmena.

Patronalari ere mezua luzatu dio, “Hazkunde ekonomikoaz eta enpresen irabaziez hitz egiten du, bada, argi esaten diogu irabazi horiek langileei esker lortu dituela eta hitzarmena lortu arte borroka jarraituko dugula”.
 

 

 

AZKEN ALBISTEAK | ÚLTIMAS NOTICIAS

Udal administrazioan euskararen normalizazioa mugatu nahi duen azken epaia gogor salatzen dugu

Euskal administrazioa euskalduntzeko prozesuaren aurka pairatzen ari garen oldarraldiaren baitan beste epai baten berri jaso dugu. Kasu honetan, Bilboko Administrazioarekiko Auzien Epaitegiaren eskutik etorri da; izan ere, Galdakaoko Udaleko Gizarteratzeko eta Laneratzeko Teknikari lanpostu bat egonkortzeko prozesuan 3. hizkuntza-eskakizuna ezartzea atzera bota du.

GUITRANSek Gipuzkoako errepide bidezko salgaien garraioaren hitzarmenaren negoziazioa blokeatuz gero, errepideak blokeatzeko deialdia egingo dugu

Gaur eratu dugu LAB, ELA, CCOO eta UGT sindikatuOk eta GUITRANS patronalak Gipuzkoako errepide bidezko salgaien garraioaren hitzarmenaren negoziazio mahaia. 2024 urtea hastearekin batera ekin genion sindikatuok hitzarmen berri baten negoziazio bideari. Izan ere, 2009ko abenduaren 31az geroztik hitzarmenik gabe dago sektorea eta lan-baldintza zeharo desarautuetan ari dira 6.000 langiletik gora.

Europako epaiak langileoi enplegu publikoa egonkortzeko borrokan beste tresna bat ematen digu

EBJA Europar Batasuneko Justizia Auzitegiaren sententziak argi uzten du administrazioek hartutako neurriek ez dutela behin-behinekotasunaren arazoa konpontzen eta neurri eraginkorragoak eskatzen ditu.