Gaur, martxoaren 22an, Arabako Batzar Nagusietako Gizarte Ongizateko Batzordean agerraldia izan dugu. Bertan berriro ere, sektore honetako langileen egoera prekarioaren larritasuna salatu dugu alderdi politiko guztien aurrean. Kanpoan mobilizazioa egin dugu.
Egoitza pribatuetako sektoreko ELA, LAB, UGT eta CCOO sindikatuok elkarretaratzea burutu genuen pasa den otsailaren 6an Gasteizko Probintzia plazan. Bertan, sektorearen prekarizazioa salatu genuen eta Arabako egoitzetako herrialdeko hitzarmenaren alde egin genuen.
Elkarretaratze horren ostean gobernuan dagoen EAJ-PNV-rekin eta oposizioan dauden PP, PSE, EH BILDU, PODEMOS, IRABAI eta ORAIN ARABA alderdiekin bilerak egin ditugu.
Bilera horietan, alderdiei eskatu zitzaien negoziaketa abiarazteko konpromisoa adierazten zuen dokumentu bat sinatzea. Alderdi guztiek sinatu zuten EAJ-PNV izan ezik. Horrek argi adierazten du, nahiz eta publikoki sektore honekin konpromiso handia dutela adierazi, errealitatean ez daudela sektore honetako egoera larriaren aurrean ezer egiteko prest.