Hego Euskal Herrian uztailean langabeziak behera egin badu ere, enpleguaren egoera oso kezkagarria da LABen ustez. Kontutan hartu beharra dago udan behin behineko lanpostu prekarioak sortu ohi direla, Industrian oporrak betetzeko eta ostalaritzan udako gorakadari aurre egiteko. Alabaina, unean uneko gora-beheretatik harago, hurrengo hamarkadarako eredua da azken urte honetan finkatzen ari dena.
Bi fenomeno hauek elkar lotuta daude: langabezia tasa iraunkor handia behar da, langabeak edozein baldintzetan lan egiteko prest egon daitezen. Honela, egiten diren kontratu berriei dagokionez, aldi baterakoak %90 izatetik %95 inguru izatera igaro dira. Era berean, kontratu berrien %40 inguru ez dira lanaldi osokoak, baizik eta astean ordu batzuetakoak. Bien bitartean, Patronalaren etekinak gora egiten ari dira etengabe. Honenbestez, eredu ekonomikoaren errotiko aldaketa nahitaezkoa da, besteak beste lan erreforma bertan behera utziz.