LABek jakinarazten du Gasteizko Arlo Sozialeko 4. Epaitegiak baliogabetzat jo duela David Garcia Laminaciones Arreguiko presidenteorde eta LABeko kidearen kaleratzea.
Kaleratze hau, besteak bezala, oinarritu zen salaketa faltsuetan, zuzendaritzaren konfiantzazko pertsonek aurkeztuta, Madrileko detektibe-agentzia batek ad hoc eginadko txostenetan eta guztiaren gainetik enpresaren fede txarrean, hastapenetan zegoen gatazkaren irtenbideak blokeatzeko.
Ia bi urte geroago, Epaitegiak gure delekatuari arrazoia eman eta enpresak berrartu eta orain arte jaso ez dituen soldatak ordaindu beharko dizkio, sententziak berak aitortzen baitu kaleratzearen arrazoia bere lan sindikala eta greba eskubidea gauzatzea izan zirela.
Dena den, baliteke zuzendaritzak trikimailuak bilatzea, beste kaleratze baliogabeetan bezala, ez berrartzeko, beraien fede txarra eta elkarrizketarako prestutasun falta ikusita. Ez babes sozial handiak, mobilizazio askotan ikusita, ez instituzioen adierazpenek, ezta langile gehienek sufritutako ondorio pertsonal eta familiar larriek ez dute lortu enpresari harroputz hauek beraien erantzukizuna onartu eta lan gatazka adostutako irtenbide batera bideratzea.
Edonola ere, Davidi, gure Delekatu Sindikalari (bere epaiketa hurrengo hilabeteetan burutuko da) eta oro har kaleratutako langileei gure babesa berresteaz gain, LABek bat egiten du Langileen Batzordeak biharko (arratsaldeko 19:00etan Bilbo plazatik) deitutako abiatuko den manifestaldiarekin. Gure ustez, inoiz baino beharrezkoagoa da mobilizazio soziala aldarrikatzeko enpleguaren defentsa, Arabako lantegietako etorkizuna, instituzioen inplikazioa, lan erreformaren arbuioa eta lan gatazkaren irtenbide adostua.