Gaur, uztailak 13, Arabako Metalgintzaren hitzarmena negoziatzeko mahaia bildu da berriro, eta, gaurkoan ere, ikusi da alde handia dagoela SEA patronalaren proposamenaren eta LABen plataformaren artean.
Lau urte dira hitzarmenik gabe, eta SEAk jarrera immobilista bera izaten jarraitzen du sektoreko langileen lan eta soldata baldintzak duintzeko beharrezkoak eta ezinbestekoak diren gaien aurrean.
Lan-baldintzak duintzeak aurrera egitea eta adostea dakar, gutxienez, honako hauek:
– Soldata-igoera duinak
– Lanaldi murrizketa
– Kontratetako langileen subrogazioa bermatzea
– Lan-kontratazioko iruzurrari aurre egitea
– Ordaindutako baimenak hobetzea
– Sektore honetan emakumearen diskriminazioarekin amaitzeko benetako konpromisoak hartzea
Sektorea suspertzea inoiz baino beharrezkoagoa da, eta, horregatik, LABek dinamika mobilizatzaileak eta salaketa dinamikak planteatzen jarraituko du, negoziazioaren blokeoaren aurrean eta SEAk hitzarmenaren negoziazioan modu serioan aurrera egiteko duen borondate ezaren aurrean.