2024-04-18
HomeEkintza SindikalaDenon enplegu duina bermatzeko, lan harremanetarako esparru propioa beharrezkoa da

Denon enplegu duina bermatzeko, lan harremanetarako esparru propioa beharrezkoa da

Nafarroako Parlamentuak enpleguari buruz egin duen osoko bilkura monografikoaren harira, LAB sindikatuak kontzentrazio zaratatsua egin du, enplegu politikan aldaketa aldarrikatzeko. Nafarroako bozeramaile Igor Arroyok eskatu du "Nafarroan eman den aldaketa lantokietara iritsi dadila. Aldaketa langileon lan eta bizi baldintzen hobekuntzan islatu behar da, enplegu politika berri baten bidez". Aldarrikapen hau sustatzeko, LABek manifestazio handi bat antolatu du martxoaren 19an Iruñean.

LABek aldarrikatzen duen enplegu politika beria bost ardatzetan oinarritzen da: lehenik eta behin, 35 orduko lan astea, Nafarroan 14.000 lanpostu baino gehiago sortuko lituzkeena; bigarrenik, 1200 euroko gutxieneko soldata, "bizitza duin eta autonomoa bermatzeko oinarrizko zorua baita"; hirugarrenik, gizon eta emakumeen arteko berdintasuna bermatzeko neurriak, hala nola industrian KYBSEko klausula ezarriz (kontratazio berrien %50 gizon eta %50 emakume) eta "lan berdinak soldata berdina" irizpidea gauzatuz; laugarrenik, zerbitzu publikoetan 5.000 lanpostu sortzea; eta azkenik, Nafarroan lan harremanetarako esparru propioa egituratzea, honelako neurriak Espainiako Gobernuaren injerentziarik gabe aplikatu ahal izateko.

Ildo honetan, Arroyok burujabetza falta salatu du: "Espainiako Gobernuak arazo zehatzei erantzuna ematen zioten 17 nafar lege indargabetu ditu. Ezin baditugu langileen lan eta bizi baldintzak hobetzeko neurriak hartu, hordagoa bota beharko dugu, eremu guztietan Nafarroaren burujabetza defendatuz, baita lan eremuan ere".
 

 

 

AZKEN ALBISTEAK | ÚLTIMAS NOTICIAS

Haurreskoletan lan baldintzak hobetuko dituen akordioa sinatu dugu

Akordioa indarrean dago jada, eta ekoizpenagatik kontratuen luzapena, lanpostuen zerrenda handitzeko prozedura eta adinagatiko murrizketaren garapena dakartza berekin.

Salatu dugu 2023an billabesetan eginiko aparteko orduek 16 lanpostu ezabatu zituztela

LABek Iruñerriko hiri garraioan duen atal sindikalak —herritarrek ‘billabesak’ deitzen dituztenak eta egun TCC enpresak kudeatzen duena— ohar batean azaltdu eta salatu du 2023an eginiko aparteko eta osagarrizko orduen batura 27.608 ordukoa izan zela; kopuru eskandalagarria guztiz, lanaldi osoko 16 lanpostu ezabatzen baititu, eta hori lanaren bidezko banaketaren aurkakoa da erabat.
00:02:29

Amazon eta Alpha North Logistics enpresekin borrokan

Amazon enpresak Trapagaranen duen lan zentroan dauden langileek beste greba ziklo bat hasi dute lan-baldintzak duintzeko. Urtebetetik gora daramate enpresarekin prekarietate gordinetik ateratzeko Hitzarmena negoziatu nahian. Baina multinazionalak jarrera entzungorra izaten jarraitzen du eta negoziazio mahaia hasieratik blokeatu du. Aldarrikapenen artean, Amazonek bere salgaien garraiorako dauzkan enpresa azpikontratatutakoen langileen lan-baldintzak egonkortzea eta enplegua bermatzea dago.