Gaur, atzo bezala, irakasleen gehiengo zabalak, %70ak, babestu du EAEko unibertsitatez kanpoko hezkuntza publikoan egindako greba. Hain zuzen ere, gelak hustu eta kalera irten gara irakasleen lan baldintzak hobetu eta Euskal Herriak merezi duen benetako hezkuntza publikoa aldarrikatzeko.
Abenduan irakasleon mahai negoziatzaileak abiapuntu bat markatu bazuen ere, proposatutako edukiak ez nahikoak eta zehaztu gabekoak dira pairatzen dugun egoerari buelta emateko. Urtarriletik ez dugu inolako berririk Lakuako Hezkuntza Sailaren partetik, eta, bitartean, irakasleentzako egonkortasun proposamenik ez, ratioen inguruko proposamenik ez, baliabide gehigarrien inguruko proposamenik ez, bajak ez zigortzeko proposamenik ez, ordezkapenak kidego guztietan lehenengo egunetik betetzeko proposamenik ez.
Ibilbidearen amaieran gaudela uste duten horiei, argi eta ozen esan nahi diegu bidearen hasieran besterik ez gaudela. Hezkuntzan paradigma aldaketa dugu jomuga. Hezkuntza burujabea eraikitzen ari gara lanean eta borrokan; pertsona burujabeak jendarte burujabe batean heziko dituen hezkuntza burujabea, alegia.
Bide horretan borrokan jarraituko dugu, grebek eta mobilizazioek emaitzak ematen dituztela erakutsi dugulako.