Bizkaiko Hirugarren Adineko zentroetako lan baldintzak eta, era berean, egoitza hauetako erabiltzaileen baldintzak hobetzeko eseri ginen mahai honetan. Patronalak langileen eskaerei muzin eginez proposamen onargaitza aukeztu du. Jarrera honen aurrean negoziazio manahitik altxatzea erabaki dugu. Otsailaren 19an Bizkaiko egoitzetako delegatu eta afiliatuen batzar orokorra deitu dugu eta bertan, hemendik aurrera begirako plangintza eta mobilizazioak zehazteko.
Urte honetan zehar Bizkaiko Hirugarren Adineko Zentruetako Hitzarmenaren negoziaketan gaude.
Jakina den bezala, egoitza hauetan lan egiten duten langileak, 5.000, lan baldintza oso gogorretan ari dira lanean. Ordu asko (1698 ordu urtean), lan karga fisiko eta emozional izugarria, pertsonal gutxi lanean, presioa, ordutegi oso ezegonkorrak… Zaintza lanez ari gara gainera eta honek sektore oso feminizatua izatea dakar eta, honek, PREKARIETATEA esan nahi du zoritxarrez.
Hau dena esanda, negoziazio mahaian, sektore honen lan baldintzak eta, era berean, egoitza hauetako erabiltzaileen baldintzak hobetzeko eseriko ginela uste bagenuen ere, patronalak proposamen onargaitza jarri du mahai gainean, langileen eskaerei muzin eginez. Lanaldiak gora, lanaren egonkortasuna %80ra jeitsi, ditugun lansariak ere murriztu, eskubide sindikaletan murrizketak….
Guzti honek, mahaian parte hartzen duten langileak zur eta lur utzi zituen, eta haien erabateko ezetza adierazi zuten mahaian bertan.
Hau ikusita, patronalak ez du beste proposamenik egiteko asmorik izan, baina langileok baditugu gure eskubideak eta hauek defendatzeko prest gaude!
Honez gain, Aldundiak, zerbitzu hauen arduraduna, beste alde batetara begiratzen du zerbitzua kalitatezkoa eta baldintza duinak izan daitezen neurririk ez hartzen.
Benetan negoziatzeko asmoa ez dagoen bitartean, beraz, LAB mahaitik altxatu da eta gurea dena eta etorkizunerako utzi nahi duguna borrokatzeko behar den guztia egingo dugu. Horretarako, Otsailaren 19an Bizkaiko egoitzetako delegatu eta afiliatuen batzar orokorra deitu dugu eta horretan, hemendik aurrera begirako plangintza eta mobilizazioak zehaztuko ditugu GESCA, LARES eta ELBE patronalei eta Bizkaiko Aldundiari benetako negoziazio bat exijitzeko.
