Bizkaibuseko zerbitzuaren emakidak jaso dituzten enpresek bermatuta dituzte Bizkaiko Foru Aldundiak esleitu dituen partiden %6ko mozkinak, 15 urteko gehiegizko aldi baterako. Dena den, aipatu mozkinari Bizkaiko Foru Aldundiaren eta honen kudeatzaileen isiltasuna lagun, egiten ari diren lanpostuen amortizazioa gehitu behar zaio.
Dirudienez, ez dago inor Garraio Sailaren gidaritzan sinatutakoa betetzeaz arduratzen dena, ez eta enpresei lanpostuak amortiza ez daitezen eta Bizkaibusen, azpikontraten bidez enplegua prekariza ez dadin eskatzeaz ere.
LABek Bizkaiko Foru Aldundiari dei egiten dio arduraz joka dezan, eta enpresei adostutakoa betetzea eska diezaien. Horrela langileok, Bizkaibusen bidez ematen dugun zerbitzu ona hondatzen eta deitu ditugun lanuzteak bertan behera utziko lituzketen negoziazioei ekingo genieke.
Aldundiak badaki autobus eta linea batzuk falta direla eta sartzeke daudela, gidaritzan lanpostuak suntsi ez daitezen. Modu berean, jakin badaki gidatzeari lotzen ez zaizkion gainontzeko arloetan, 60 lanpostutako galera izango dela. Haiek lanpostuak ez zituztela amortizatuko agindu zuten. Ez dira hitza betetzen ari, eta ez dute betearazten.
Aldundiak sinatu zuen akordioa betetzeko gogoa hutsaren hurrengoa da. Alde batetik, aurrekontu partidak oraindik lanpostuak amortizatzeko diru-kopurua jasotzen duelako, eta bestetik, enpresei ez dietelako eskatzen lanpostuen suntsiketa eragoztea. 2013. urtean, Aldundiak agindu zuen eutsi egingo ziela hauei, egiturari lotuak zeuden lanpostuak errespetatuko eta kuantifikatuko zituztela.
LABek datu hauek ditu eskuartean, aurreko Garraio Zuzendaritzari eman zizkion. Ederto ezagutzen dituzte kopuruak eta zenbat lanpostu amortizatu gura dituzten, jakin badakite zer sinatu zuten eta itun haiek ez dituztela betetzen, eta haien asmoa Bizkaibuseko zerbitzua prekarizatzea dela.
Zerbitzuaren prekarizazioa ez da epe motzean nabarituko, baina gidatze lanetakoak ez diren lanpostu askotan galerak izan ostean, autobusen mantentze-lana murriztuko da etorkizunean: amortizatu gura dituzten lanpostu erdia tailerreko langileei dagokie, eta hauek arduratzen dira autobusak gidatzeko baldintza onetan egon daitezen.
Honengatik guztiarengatik, LABek argi adierazi nahi du Bizkaiko jendartearen aurrean, ez garela lan gatazka huts batez ari, Aldundiak gezurra esaten diola jendarteari hori esatean. LABek ez du gatazka honen amaiera balioztatuko lanpostuak ziurtatu ezean, horiek bermatzen dutelako Bizkaibusen zerbitzu ona eskaintzen dela. Gatazka ez da amaituko lan baldintzak kaskartuko ez direla ziurtatu ezean. Ez dugu utziko ez lanposturik, ez eta Bizkaibuseko langilei dagokien eskubide bakar bat ere zapuztu dadin, horixe adostu dugulako gainontzeko sindikatuekin.