Atzo hasi zuen LABek Bizkaiko egoitzetako langileen itxialdia Bilboko Atxuri auzoko Enkarnazioaren elizan. Ekimen honekin batera, hiru egunetako greba deitu du LABek Bizkaiko egoitzetan, abenduaren 14, 15 eta 16rako. Gaur, Batzar Nagusien egoitzaren aurrean mobilizatu dira grebalariak eta zuzenean interpelatu dute Sergio Murillo Gizarte Ekintzako diputatua, Aldundiak egoitzetako gatazkan duen erantzukizuna nabarmenduz, “Greban gaude, Murillo non zaude?” oihu artean.
Atzo goizean itxialdia hasi zutenetik, hainbat ekimen egin dituzte Bizkaiko egoitzetako langileek. Atzo bertan, manifestazioa egin zuten Atxuritik Erriberako egoitzara. Eta arratsaldean, egoitzetako gatazkaren inguruko hitzaldia eman zuten Ainhoa Etxaide eta Arantza Zulueta LABeko Idazkaritza feministako kideek. Egoitzetako gatazka gai laboral batetik harago doala nabarmendu zuten, zaintzaren afera erdigunean kokatzen duelako, eta honen izaera soziala eta inplikazio politikoak nabarmendu zituzten. Egun pribatizatuta dauden zaintza lanak publikoak izan beharko luketeela adierazi zuten.
Enkarnazioaren elizan lehen gaua igaro ondoren, gaur goizean ere euren aldarrikapenak zabaltzen ari dira grebalariak Bilboko kaleetatik zehar, “Funtsezkoak gara” lelodun kamiseta moreak soinean. Horrela, pankarta erraldoi bat zabaldu dute Alde Zaharreko Unamuno plazan eta ondoren, Batzar Nagusietako egoitzaren aurrean mobilizatu dira.
Gaur arratsaldean, 18:00etan, grebalarien elkargunea egingo dute Enkarnazioaren elizan. Hemen, grebalariek lan-baldintza eta zaintza duinen alde egiten ari diren borrokan izandako bizipenak partekatzeko aukera izango dute. 19:30ean, poteo musikatua egingo dute Atxuri eta Alde Zaharretik. Bigarren gaua elizan igaro ondoren, bihar goizean amaituko dute itxialdia, hiru egunetako ekimena biribilduz.