2013ko urrian eta 2014ko azaroan itxi ziren Bizkaiko Foru Aldundiarekin akordioak. Hauen arabera, 2013ko urriaren 3an zeuden lanpostuetako bat bera ere ez amortizatzeko konpromisoa hartzen zuen Aldundiak. Hiru urte baino gehiago pasatu dira Aldundiarekin sinatutako azken akordioetatik eta LABetik ikusten dugu gidaritza lanarekin harremanik ez duten lanpostuak suntsitzen aritu direla. Egoera hau salatzeko mobilizazioa egin dugu Bizkaiko Foru Aldundiaren Garraio Sailaren aurrean.

Enpresa-batzorde ezberdinetan enplegu suntsiketa honen aurreko erantzun sindikal bateratua adosten saiatu gara, zoritxarrez posible izan ez dena, baina espero dugu azkenean lortzea, gai honek Bizkaibuseko langileontzat duen garrantzia kontuan izanda.

Behin hona iritsita, eta Bizkaibuseko enpresa ezberdinetako LABeko gainontzeko delegatuekin kontrastea egin ondoren, geratzen zaigun bakarra da publikoki salatzea iragarritako enplegu suntsiketa baten kronika, enpresek modu bikainean antolatua eta Aldundiak ahalbideratu duena intentzionalitate argi batekin.

Aldundiak 12 milioi euro bideratu zituen 2017ra arte (enpresa bakoitzaren emakidari gehiagarriak) lanpostuak amortizatzeko.

Isilpeko enplegu suntsiketarako emandako “diru-laguntza” hau orain amaituko da. Eta orain zer? Nola atera ahal diote enpresek diru gehiago Aldundiari? Nola jarraitu ahal dute are irabazi gehiago ateratzen pribatizatutako zerbitzu publiko batetik?

LABetik ulertzen dugu akordioak akordioak betearazi behar direla eta gidatzearekin lotuta ez dauden arloetan lanpostuen amortizazioa ez onartzeko, horrela zerbitzuaren kalitateari eutsiz. Horrela ez bada behera egingo du Bizkaibusen kalitateak eta linea eta autobusen segurtasunari eragin diezaioke.

Honakoak dira gidatzearekin lotutako hainbat esparrutan ikusten ari garen enplegu suntsiketa eta lanpostuen amortizazioa:

1- Tailerrak: Gero eta langile gutxiago dago ibigailuak konpontzeko, denok ditugu gogoak Bilbobusetan Veoliaren gurpilekin gertatutakoak. Lanpostuak amortizatzeaz gain, enpresek Bizkaibuseko tailerreko langileak erabiltzen dituzte kanpoko enpresa batzuen konponketetarako, Bizkaibuseko emakidarekin zerikusirik ez dutenak. Horrela, diru publiko hau euren irabazi partikularrerako erabiltzen dute eta ez zerbitzua hobetzeko.

2- Autobusen erregaia hartzea: zuzenean kontratatuta zeuden eta jubilatuz joan diren pertsonen lanpostuak azpikontratatu egin dituzte, horrela lanpostuak amortizatuz, lan-baldintzak prekarizatuz eta zerbitzuaren kalitateari eraginez.

3- Ikuskaritza: langileak erretiroa hartzen ari dira eta enpresek ez dute langilerik kontratatzen lanpostu hauetarako. Denbora gutxiago eskaintzen zaio zerbitzuen antolaketari, intzidentziei eta iruzurraren kontrolari, zerbitzuaren kalitateari eragiten diolarik.

Aldundiari honakoa eskatzen diogu:

– Sinatutako akordioak bete eta betearaztea.
– Bizkaibusen inbertitutako diru publikoa kontrolatzea eta hobeto zaintzea datozen 12 urteotan emakidak kudeatuko dituzten enpresen jarduera.
– Tailerretan, erregaia hartzean, ikuskaritzan etab. kendutako lanpostuak berreskuratzea.

Gaur hona etorri gara egoera salatzeko eta Aldundiari bilera eskatzeko, bertan aipatu arazoei ekiteko, Sail honek sinatu dituen akordioak betetzeari begira.