Elkarretaratzea egin du sindikatuak Azkunak eta bere taldeaak bultzatutako aurrekontuen onarpena salatzeko. Bertan LABek salatu duenez, Bilboko udalak bere aurrekontuetan azpikontratazioaren aldeko apustua egiten jarraitzen dut, izan ere aurrekontuaren %30, hau da, 140 miloi euro inguru, azpikontratazioetara bideratuko da.

Azpikontratazioen aldeko apustu honek, batetik enpresa gutxi batzuk diru publikoa erabiliaz etekinak pilatzea bermatzen du eta bestetik, erabiltzaileek zerbitzu kaxkarragoa jasotzea eta langileek lan baldintza txarragoak edukitzea.

Azpikontratazioaren aldeko hautu honetaz gain, udaletxeko langileriari dagokionean, adierazgarria da, 2013ko aurrekontu orokorrak % 3,68 murrizketa bat izan arren, pertsonal gastuak %4,86an murriztu direla, hau da 7,2 miloi euro gutxiago egongo dira datorren urterako. Plantilan dauden plazaz kopurua %3,7 batean murriztu dira, gainera honen %4 bete gabe dago eta azkenik plantilaren %12 inguru bitarteko kontratupean daude.

Etxeko Arreta Zerbitzuan emango den murrizketa ikaragarria aipatu nahi genuke ere, bertako aurrekontua ia miloi batean murriztuko baita. Batetik zerbitzuak eskainiko dituen ordu kopurua murriztuko da, 25.000 ordu gutxiago eskainiko baitira, ondorioz lan postuen suntsipena ekarriaz eta erabiltzaileentzat arreta kaxkartuaz.

Zerbitzu honek eskainitako ordu kopurua murrizteaz gain, ordu hauengatik azpikontratatutako enpresari ordainduko zaien prezioa ere murriztuko zaie. Ziur gaude murrizketa hau sektoreko langileen bizkar joanen dela, jada prekarietatea pairatzen duten emakume langile hauen gain.

Adierazgarria da Berdintasun, elkarlan eta hiritartasun sailak jasaten duen murrizketa latza %30 ingurukoa, honen pisua aurrekontu osoan %1ra iristen ez delarik. Honek argi erakusten digu zein den udaletxearen jarrera, eta bereziki parekidetasunaren alde lan egiteko borondate eza.

Bilbon bizi edo lan egiten dugun guztioi eragingo digun beste ezkutuko murrizketa bat, Bilbobusen emango dena da. Izan ere nahiz eta bertara bideratutako diru kantitatea mantenduko den, autobus zerbitzuen murrizketa bat emango da, maiztasunak murriztu egingo bai dira eta zerbitzuaren baldintzak kaxkartuko dira, egoera honek Bilbobuseko langileengan ere eragina izango duela bistakoa da.

Amaitzeko aipatu nahi genuke, astakeria bat iruditzen zaigula, egun bizi dugun egoeran 9,3 miloi euro Deustuko kanala zabaltzera bideratzea (hiru urtez 30 miloira iritsiko den gastua), askoz egokiago litzateke dirutza hau jendearen eskubide sozialak bermatzera bideratuko balitz. Are eta uler gaitzagoa egiten zaigu, 9,3 miloi horietarik 5 Udal Etxebizitza zerbitzuak jartzea eta horretarako honen ondasunak saldu behar izatea, dirutza hau berehala erabili beharko litzateke dagoen etxebizitza beharrari aurre egiteko.

Argi dago beraz Bilboko udalak eraikuntzaren aldeko apustua egiten jarraitzen duela, proiektu erraldoien bidez, honen adierazgarri da ere, orokorrean tasa eta bestelako zergak, bataz beste %2,5 igo arren, eraikuntza alorreko enpresei eragiten dieten hainbat salbuespen eta deskontu ezarri dituztela. Zerga bilketa murriztuaz, sektore hau bultzatzeko intentzioz, baina argi geratu da azken urteetan hau ez dela langabeziarekin amaitzeko bidea, 30.859 Bilbotarrek pairatzen duten langabeziari ez zaio horrela aurre egiten.

 

MOBILIZAZIOAREN ARGAZKIAK