Albiste ona da hau, Udal Sareak sortu zenetik LAB Sindikatuak, beste ordezkariekin batera, aurrera eramandako borrokaren emaitza izan baita. Proiektu honen funtsa eta garrantzia agerian uztea izan da borroka honen helburua, hortarako ekimen ezberdinak aurrera eramanaz; Batzar Nagusietan eta Bilboko Udalean mozioak aurkeztea, herritarrak informatzea, Partzuergoko langileon mobilizazioak udal ordezkarien batzarraren aurrean…
Kalitatezko zerbitzu publikoen aldeko borrokan garaipen txiki bat da hau; izan ere, helburu bera izaten jarraitzen duen aldaketa formal bat besterik ez da. Beraien helburua, funtsezko zerbitzu hau esku pribatuen esku uztea da, multinazionalen poltsikoak diruz betez eta herritarren interesen kontra eginez, hauei garestiagoa izango zaien zerbitzu kaxkarrago bat eskainiz.
Bere garaian Udal Sareak erakundeari lagatako eskumen guztiak Partzuergoak bere gain hartzeko erabakiak ez du Partzuergoaren norabide pribatizatzailea aldatzen, izan ere, etengabe ikusten dugu Partzuergoaren eskuduntzak enpresa pribatuen mesedetan azpikontratatzen direla.
LAB Sindikatutik % 100ean publikoa izango den zerbitzu baten defentsan eta pribatizazioen aurka borrokatzen jarraituko dugu, kapitalaren interesen gainetik pertsonak eta kalitatezko zerbitzu publikoak ezarriz.