LABek eta ELAk borrokaldia areagotuko dute maiatzaren 3tik aurrera, eta jarraipena emango diote aurreko greba-deialdiari, maiatzaren 2an amaitu baitzen haren indarraldia. Astelehenetik ostiralera 10:00etatik 13:00etara arteko lanuzteak egingo dituzte.
LABek eta ELAk EAEko justizian aurrera daramaten borrokari jarraipena emango diote maiatzaren 2tik (orduan amaitzen da oraingo greba deialdia) aurrera ere.
Deialdi berri honetan, eta justiziako kolektiboak grebari egindako jarraipena dela eta, bi sindikatuek mobilizazioak areagotzea erabaki dute, egunero 3 orduko lanuzteak egingo dituztelarik 10:00etatik 13:00etara. Horrez gai, maiatzaren 10ean egun osoko greba egiteko aukera legoke, baldin eta batzarretan hala erabakitzen bada.
Protestarako arrazoiak ezagun dira jada:
- Sindikatuekin sinatutako IV. Hitzarmen Arautzailea betetzea, Eusko Jaurlaritzak sistematikoki urratzen baitu 2012az geroztik. Plantilla Euskal Autonomia Erkidegoko Administrazio Orokorreko langileen soldata-baldintzekin parekatzea dakar horrek.
- Erretiro-baldintzetan parekatzea eta Genero Indarkeriaren Epaitegietako langileentzat absorbiblea izango ez den soldata-plusa.
- Era berean, bi sindikatuek lanpostuak baloratzeko deia egin dute, beren jarduera zuzentzen duten legeek (Botere Judizialaren Lege Organikoa eta Administrazio Eraginkortasunaren Legea) bete beharreko eginkizunak kontuan hartuta.
Bi sindikatuok Eusko Jaurlaritzari eskatzen diogu beste alde batera begiratzeari utz diezaiola, bere erantzukizuna bere gain har dezala eta berehala bete dezala orain 10 urte baino gehiago Idoia Mendia Laneko sailburuak, bere garaian Justiziako sailburu izanak, sinatutako akordioa.
Era berean, ELAk eta LABek gogorarazi dute deialdi hori maiatzaren 3tik 17ra bitartean egingo dela, eta, beraz, plantillarekin aztertuko dela egun horretatik aurrera borroka areagotzeko aukera.
Amaitzeko, LABek eta ELAk dei egiten diete Euskal Autonomia Erkidegoko Justizia Administrazioko langile guztiei orain arte bezala jarrai dezaten greba babesten eta modu aktiboan parte har dezaten behar bezala iragarriko diren elkarretaratze eta bestelako mobilizazioetan.