Atzo Donezteben, etxe kaleratze prozesu batean zegoen pertsona batek bere buruaz bertze egin du. Euskal Herria Martxan ekimenaren sustatzaile garen ELA, LAB, ESK, STEE-EILAS, EHNE, HIRU, CGT-LKN, CNT sindikatuek eta eragile sozialek etxebizitza gabezia eta hau galtzeko arriskuarekin lotura duten heriotza gehiegi eman direla salatzen dugu.
Enpleguaren suntsiketa, gastu sozialaren murrizketak, zerbitzu sozialetan pertsonal eta baliabideen murrizketak, osasungintzan emandako murrizketak… ondorio larriak dituzte, bai norbanakoarengan, baita jendartean ere. Etxebizitza eskubidearen gainetik banka eta higiezinen negozioa babesteko gobernuek harturiko neurriek ere ondorio larriak dituzte, bai alokairua ezin ordaindu izangatik direnak eta bai hipoteka ordaindu ezinaren ondorio direnak.
Etxebizitza duin baterako eskubidea, pertsona ororen eskubidea izatea eskatzen dugu. Bankak etxebizitza sektorean daukan monopolioari aurre egiteko politikak ezarri behar dira instituzioetatik. Diru publikoa gehiengoaren eskubide eta beharrak asetzeko baliatuko dituen politikak behar dira.
Beraz, Nafarroako eta EAEko Gobernuei, Madridera so egon beharrean, pertsona guztiei etxebizitza eskubidea bermatzeko neurriak bertan har ditzaten dei egiten diegu. Etxebizitza ezin da espekulaziorako tresna bat izan, guztion eskubide bat da.
Azkenik, dei egiten dugu ostiral honetarako EAEko hiru hiriburuetan deituak ditugun manifestazioetan parte hartzeko. Lan duina eta eskubide sozialak aldarrikatzeko deituriko mobilizazio horiek, ezinbestean, atzoko gertakari larria salatu eta etxebizitza eskubidea aldarrikatzeko baliatuko ditugu.
DEIALDIAK
BILBO
18.30etan Jesusen Bihotzatik
GASTEIZ
19.00etan Bilbo plazatik
DONOSTIA
19.00etan Bulebarretik