Asteasuko lantegia Siemens Gamesako GET dibisioaren barruan kokatuta dago eta 200 langile ditu. LABeko 7 ordezkarik eta independiente 2k osatzen dute enpresa-batzordea. Atzo, uztailaren 11n egindako batzarrean, langileek bost egunez lanuzteak egitea erabaki zuten, enpresaren etorkizuna airean dagoelako. Gaur, bihar eta etzi txanda bakoitzean ordubeteko lanuztea egingo dute (hiru txandetan egiten dute lan) eta uztailaren 18 eta 19an, ordu biko lanuzteak egingo dituzte txanda bakoitzean.
Siemens Gamesaren salmenta posiblearen aurrean duten ziurgabetasunaren ondorioz, langileek lan postuen bermea, lan baldintzak mantentzea eta Asteasuko plantarako plan industrial bat exijitzen dizkiote enpresari.
LABek ere proiektuaren etorkizunari buruzko kezka azaldu die Eusko Jaurlaritza eta gainerako instituzioei eta enpleguaren, teknologiaren eta ekoizpen guneen defentsan jarrera tinkoa izateko exijitzen die.