Bide bakarra dago, borroka eta mobilizazioa, patronalak eta bere enpresek xantaia utz dezaten. LABek mobilizazio egutegia aurkeztuko du datorren martxoaren 20an CEBEKen aurrean, 11:00etan egingo duen mobilizazio batean.
LABek, Bizkaiko bulego eta langelen sektorea dagoen egoera aztertu ondoren, proposamen berria ekarri du hitzarmenaren negoziazio mahaira. Sinatzeko moduko proposamena da gure ustez, hau da, azken proposamen bat da eta ez bere edukiak beherantz negoziatzeko proposamena. Bertan ikus daitekeenez, ahalegin handia egin dugu gure hitzarmenaren bi oinarriak ikutuz berau sinatzea helburu moduan hartuta.
Eta gure borondatea argi gera dadin, proposamena behin betikoa izan eta berau sinatzekoa, altxatu egingo gara negoziaziorik ez dagoen mahai honetatik, patronalak hausnartu eta hitzarmen duina sinatu ahal izan arte. Ateak zabalik izango ditugu, beti ere patronalak xantaia albo batera utzi eta gutxieneko hauek baliozkotzat jotzen dituen bitartean.