Abenduaren 11tik greba mugagabean daude Alfako langileak. Enpresak likidazioa aurkeztu zuen eta langileen hainbat mobilizazioa egin dituzte ordutik hona; gaur goizean, azkena. Hain zuzen ere, kotxe-karabana bat egin dute eta elkarretaratze bat, Untzaga plazan.
Hauxe da enpresa batzordeak igorritako oharra:
Alfa Taldeko langileak 2017an amaitutako parametro berdinetan eman diote hasiera urteari, GREBA MUGAGABE batekin lanpostuen defentsan eta Eibarko lantegi enblematikoenaren etorkizunaren alde borrokan.
Modu berean 2018ko lehen asteko grebak izandako jarraipenaren berri eman nahi dugu, hainbat hedabidek datu okerrak zabaldu baitituzte. Egun lanean diren eskirolen portzentaia Alfa Precision Casting-en %33,59koa da, eta hori erakusten duten egunero enpresak sinatutako aktak ditugu.
Likidazio prozesuaren harira, aste honetan jaso berri dugu epaileak prozesuari oniritzia eman dionaren komunikatua eta 15 egunen epean likidazio plan bat jarri beharko duten administratzaile konkurtsalak izendatu dituela.
Horregatik, datorren astean Eusko Jaurlaritzarekin bilduko gara eta asteartean, Administratzaile Konkurtsalekin, hiru puntu hauetan oinarritutako akordio batetara heltzeko:
Taldea osatzen duten enpresa guztietan enplegua egonkortzeko eta hari eusteko konpromisoa.
Jendea kaleratzekotan, ez dadila modu traumatikoan egin.
Langileek eta hauen senideek Alfa taldeko enpresetan izan dezaketen etorkizunari buruzko informazio argia, erreala eta zehatza jaso behar dute, baita likidazio planari buruzko informazioa ere.
Askotan esan dugu, eta ez gara errepikatzeaz nekatuko. Hemen gertatu denaren ardura hiru pertsona hauek dute: Jon Ander Buenetxea, Iñaki Uzkudun eta Jorge Agirrebeña. Hauek 2.289.092 euro banatu zituzten euren artean, Alfa taldea egoera zailean zegoenean, hartzekodunen hitzarmen bat egonda. Kudeatzaile miresgarri hauek eraman dute Alfa taldea dagoen egoerara.
Bukatzeko, enpresa batzordetik deituko ditugun mobilizazioetan parte hartzeko deia egiten dugu.