LAB sindikatuak martxoaren 23an jaso zuen Haizea Wind enpresaren aurka jarri zuen salaketaren epaia, Bizkaiko metaleko greben ondoren langileak kaleratzeagatik; magistratuaren epaia honakoa da:
-Gure afiliatuaren kaleratzea baliogabetzat jo du. Hala, enpresak berronartu beharko du.
-Iruzur bidez kaleratuta egon zen bitartean jaso ez zituen soldatak ordaintzera kondenatzen du enpresa. Hau da, soldata guztiak 2019-8-30etik, beren lanpostura itzultzen duten egunera arte.
-Enpresa kondenatzen du langileari kalte moralengatik 6.251 euroko kalte-ordaina ordaintzera.
LABetik epai hori azpimarratu nahi dugu, iritzi publikoaren eta erakundeen aurrean salatu izan duguna. Haizea Wind enpresan langileen oinarrizko eskubideak urratzen dira, Haizea Wind enpresan lana prekarizatzen da eta Haizea Wind enpresan ez da onartzen langile klasearen menpekotasunik eza.
Santurtziko Super Portuan dagoen enpresa honek duela 2 urte eta erdi ekin zion bere ibilbideari, eta horretarako Eusko Jaurlaritzaren eta Urkullu lehendakariaren propaganda eta adostasun osoa lortu zuen, eta, ondorioz, baita EAJ alderdiarena ere. Ez ziren nekatu interbentzio guztietan errepikatzen enpresa hori "EAEko 4.0 industriaren harribitxi" bihurtuko zela… Bada, hau da haien benetako aurpegia: errepresio sindikalaren eta oinarrizko eskubideen urraketen harribitxia, greba eskubidearen urraketatik abiatuta.
Gogorarazi nahi dugu, halaber, enpresa honetan 30 kaleratze baino gehiago egin zirela Bizkaiko metalaren sektoreko hitzarmena dela-eta egindako greba-egunen ondoren, fabrikaren barruan lanak azpikontratatu zirela modu masiboan, baita ABLEetako langileak ere. Hau da, Haizea Wind ezaugarritzen eta identifikatzen duen zerbait badago, erabateko prekarietatea da, eta lan-eskubideekiko mespretxua.
Gogorarazi nahi dugu Abanto-Zierbenako udal-gobernuaren erabateko koldarkeria (lantegia EAJk gobernatzen duen udalerri honetan dago). LABek aurkeztutako mozioaren aurrean, non eskatzen genuen udalbatzak langileen eskubideak defendatzea, alkateak "Justizia arruntera" bidali gintuen. Orain, alkateak zer esan behar du?
Azkenik, langile guztiei animatzen diegu borroka dela bidea, ez dezatela utzi eskrupulurik gabeko jauntxo hauek zapaltzen, antola daitezela eta beren lan-eskubideak balia ditzatela.