LAB sindikatuak Gipuzkoako herritarrei Matia Fundazioko langileen egoeraren berri eman nahi die, azken erabaki batek sortu duen kezka dela eta.
Fundazioko zuzendaritzak lehenengo bajaren %100eko osagarria kentzea erabaki du, langileen aurkako neurri larria ezarriz. Nahiz eta osagarri hori urte amaieran ordainduko dela iragarri, erabakiak berehalako kalte ekonomiko nabarmena eragiten die langileei. Gainera, neurri horren bidez, langileak iruzurraren susmopean jartzen dira, eta, modu orokorrean, bajak osasun arrazoirik gabe hartzea egozten zaie.
Sindikatuak salatzen du zuzendaritzak ez duela bestelako irtenbide edo baliabiderik bilatu, eta, aitzitik, langileen kolektiboari zuzenean eragiten dioten neurriak hartu dituela.
Gogorarazi nahi da aldi baterako ezintasun gehienak gaixotasun arrunten ondorio direla, eta kasu askotan lan-baldintzek berak eragindakoak direla. Hala ere, mutuek ez dute egoera hori aitortzen eta enpresen interesak lehenesten dituzte, baja horiek arrunt gisa sailkatuz. Praktika horiek dira, hain zuzen ere, benetako iruzurra.
“Zaintzailea zaindu” izan da fundazioaren leloetako bat. LAB sindikatuak galdera zuzena egiten du: non geratu da konpromiso hori?