G7ko agintariak Biarritzera etorriko dira abuztuaren 24, 25 eta 26an, goi gailurra egiteko. Hori dela eta, “G7 EZ! Euskal Herritik beste mundu bat sortzen” plataformak kontragailurra antolatu du Irun eta Hendaian, abuztuaren 21 eta 23 artean, zenbait mobilizaziorekin batera. Hainbat eragilek osatzen dute aipatutako plataforma, eta LAB sustatzaileen artean dago. Hain zuzen ere, LABeko idazkari nagusi ondoko ez ezik, plataformako ordezkari ere bada Igor Arroyo. Hala, Irungo Ficoban abuztuaren 21ean abiatuko den kontragailurraren nondik norakoak azaldu ditu.
“Borroka ideologikoari, eztabaidari eta mobilizazio baketsuari lehentasuna emango diogu, eta antolatutako eremuan hori izango da planteatuko den jarduera”. Hala berretsi du Igor Arroyok Euskadi Irratiko Faktoria saioan egindako elkarrizketan, Irun eta Hendaian egingo diren jarduerei buruz aritzerakoan. Hain justu, ekimenez bete-beteta dator G7 EZ! plataformak prestatutako egitaraua.
Igor Arroyoren hitzetan, “alternatiben lurraldea eremu aske bat izango da, non guztiak elkartu ahalko garen eztabaidatzeko, mobilizatzeko, alternatibez hitz egiteko eta premiazkoa den alternatiben inguruan indarrak biltzeko, ikuspegi estrategiko batetik. Guretzat, hemen jokoan dagoena ez da egun batzuetako kontua, gure munduarekin, gure herriarekin, gure etorkizunarekin zer gertatuko den baizik”.
G7 EZ! plataformako ordezkariaren esanetan, “G7ak bi gauza ordezkatzen ditu, batez ere. Lehenik, sostengarria ez den eredu bat ordezkatzen du, etekin enpresarialak lehentasun jartzen duen eredu kapitalista bat. Hau ez da bidezkoa, baina ezta sostengarria ere ikuspegi ekologiko, sozial eta ekonomiko batetik. Beraz, aldaketa soziala, eredu aldaketa bat, beharrezkoa da. Bigarrenik, ikusten ari gara demokratizazioari buruz hitz egiten ari dela mundu mailan, baina errealitatea da etekinak eta aberastasuna pilatzen diren neurri berean pilatzen ari dela boterea; alegia, gero eta jende gutxiago gero eta boteretsuagoa dela, eta G7ak hori ere ordezkatzen du”.
Horren aurrean, demokrazia zentzu sakonenean aldarrikatu behar dela iritzi du: “Herriaren gobernua aldarrikatu behar dugu, herrien gobernua, burujabetza, erabakitzeko eskubidea; gure gorputzen inguruan, gure bizimoldearen inguruan, herri bezala dugun etorkizunaren inguruan. Bi ardatz horien inguruan, alternatibak beharrezkoak eta posible direla aldarrikatzea beharrezkoa da”.