Pasa den ostegunean, langile bati eraso egin zioten bere jardunean zela. Euskotrenen batzorde iraunkorrak eraso hau zein gainerako langileek bere jardunean pairatzen dituzten erasoak deitoratu ditu. Hala, elkarretaratze bat egin dute gaur, Otxarkoagako geltoki parean, Bilboko Kepa Enbeita plazan.
Jendaurrean bere lana garatzen duten Euskotreneko langileek (kontu-hartzaileak, garbiketako langileak, gidaritza agenteak, Bezero Arretarako Bulegoetako langileak,…) Euskotrenen erabiltzaileei laguntza emateko eta garraio publikoaren erabilera zuzena bermatzeko egiten dute lan.
Guztiz onartezina da bere lana egiteagatik hainbat langilek isekak, mehatxuak edota erasoak pairatu behar izatea.
Horrelako jarrerak gutxiengo batek burutzen dituela nabarmenduagatik ere, bere kezka agertu du Euskotreneko batzorde iraunkorrak. Harremanek abegikortasun eta errespetuan behar dute oinarritu.