El Corte Inglesetik ospakizunetan gaudela esaten digute, “50 urte etorkizunera begira” deitu dute, baina, gure ustez, 50 urte dira Bilboko “Triangulu berdeak” milaka langile esplotatzen dituela, urtero falta gabe beraien Administrazio Kontseiluan banatzen dituzten mozkinak sortuz.
Urte asko dira ere, zapaldutako duintasunagatik egindako borroka sindikalak hasiera izan zuela, urteak dira behin eta berriz diskriminatuak izan garela, urteak Madrildik jasandako inposizioei aurre egiten diegula, guztion eskubideak lortzeko proposamenak egiten ditugula, igande eta jai-egunetako itxieren defentsa egiten dugula… urteak LABek langileekiko bere konpromisoa mantentzen duela.
1969 hark ez du gaur egunekoarekin zer ikusirik, eskerrak. Baina lan-harremanen errealitateak urte guzti hauetako alarmak saltatzen jarraitzen du. Formak makilatu dituzte denak berdin, edo okerrago, jarrai dezan, gai batzuetan bereziki. Oin eta eskuak lotu dizkigute gutxika lan-taldea amortizatzen joateko, eros ahalmena galduz gero eta lan eta erantzukizun gehiago pilatuz. Merkataritza estrategia txarrak eta kudeaketa are txarragoa. Urte gehiegi beraien zilborretara begiratzen, ez dakite nora begiratu.
Orain, zuzendaritzarik ospakizun garaia dela esaten digute, 50 urte, eta gidoia idatzita dute: "El Correon" atera duten erreportajea zabala enpresa goraipatuz, Bilboko hiriari egindako balizko “ekarpenak” eta aitortza eskertzen dieten beraien kolaboratzaileak, eta, nola ez, guri eskainitako aitortza faltsua. Jasaten dugun dekadentzia estaltzeko errezelak.
Ospakizunaren ginda bere langileak erabiltzen dituen kanpaina berri horrek jarriko du. Era susmagarrian langileak erabiltzen ditu. Noski, doako publizitatea da eta itxura oso ona ematen dute… “zein ongi eramaten diren Corte Inglesean beraien langileekin”, “zein pozik ageri diren argazkietan”… gainera, azken kanpaina matxisten aurrean aurpegia zurituz. Nor engainatu nahi dute? Gainera, 50 urteak “ospatzeko”, langileok gure irudia eskaintzea espero dute euro miserable batzuk “oparituko” dizkiguten zozketan sartuko garela hitz emanez, ezin hobea gure soldata miserableak disimulatzeko.
Kanpaina berrian, “emakumeon beharrak asteko 7 egunetan asetu nahi” dituztela esaten dute; beraien langileen lan-baldintzak hobetzetik hasi ahalko ziren, Estatuko hitzarmenen bidez prekarietatera kondenatuak gauden horienak, hilabete bukaerara heltzeko arazoak ditugunenak, lanean sortzen dizkiguten osasun-arazoak ditugunonak, zeharkako diskriminazioak jasaten ditugunonak eta abar luze bat.
El Corte Ingles-ek erabili egin nahi gaitu eta bere ekintzetako borondatezko laguntzaile bezala azaldu, benetan, beraien tresna bat baino ez garenean, dituzten helburuak lortzeko eta behin eta berriz mozkinak lortzeko objektu bezala erabiltzen gaituztenean.
Ez da egia, beraien koloreak ez dira langileonak. Negozioa hobe zihoanean bizkarra ematen ziguten eta orain haizea kontran datorkiela, gure beharra dute. Gezurra baino ez dute, ardura gabeko esplotatzaileak, gaur kontuan gaituztela simulatzen dutenak, inoiz ez gaituztenean izan. LABetik gure deia langileei “antzarra perratzera” bidali ditzazuen, ez oparitu zuen irudia beraien onurarako.