LABek beste garaipen bat lortu du langileen eskubideen aldeko borrokan. 2025eko ekainaren 18an, asteazkenean, Euskal Autonomia Erkidegoko Auzitegi Nagusiak epaia eman zuen, Bilboko Portuko zamaketarien artean soldata-diskriminazioa eragiten zuen egoerari amaiera emanez.
2005ean, hitzarmen kolektiboak antzinatasun-osagarria ezabatu zien egun horretatik aurrera kontratatutako langileei, aurretik lanean zebiltzanei mantendu zitzaien bitartean. Praktika horrek diskriminazio argia sortu zuen: lan berdina egiteagatik soldata ezberdina jasotzen zuten langileek.
Zer dakar epai honek?
– Soldata-diskriminazioaren amaiera: bidegabekeria historiko hau konpontzeko eta berdintasun-printzipioa bermatzeko atea irekitzen du.
-Eskubideen aitortza: enpresaren praktika arbitrarioa agerian geratu da eta honi amaiera jartzen dio.
-Indar sindikala sendotzea: LABen borroka antolatuak lorpen zehatzak ematen ditu langileen alde.
Epai honek 150 zamaketari baino gehiagori eragiten die. Oraindik bide judiziala abiatu ez dutenek aukera izango dute, BILBO ESTIBAk langile bakoitzari urteko 1.500 € baino gehiago zor baitizkio. Zenbateko horiek soldata-masaren parte izango dira aurrerantzean, 2005a baino lehen eta ondoren lanera sartutakoen artean bereizketarik egin gabe.
LABek dei egiten dio patronalari epaiari helegiterik ez jartzeko eta erabakia onar dezan. LABek sektoreko lan-baldintzen erabateko berdintasunaren alde lanean jarraituko du.